Варянь варяганянза

/Мокшанский язык/

Изображение: рисунок Е. Колмаковой.

Кодась тядяц Варянди од варяганят. Эхи мазынят лиссть! Акшенят, ляпонят. Лангозост ловонь тяштенят тядяц сёрмадсь. Пяк Варянь мяльс варягатне тусть. Варжазень – ладясть, кяднянзон коряват. Тяфта и кармась теест мярьгома – Ловонь тяштенят.

Ушедсь стирнясь тялоть эса эряскофтома. Сяс мес Ловонь тяштенятне – тялонь варяганят. Синь аф щашендсазь сёксенда. Кда туй пизем, эстокиге начфтсыне. Ужяль кармайхть Варянди. Катк ащихть эсь вастсост и учсазь тялоть.
Стирнясь эрь шиня малаткшнесь вальмяти и ванондозе ушеть. Но ловсь кодавок ашезь эвонда. Менельста вастозонза пяярсть пизем путерькскат. Варянь мархта лажнасть и варяганянза, куфкснесть шобда шкафса.

Сась понедельниксь. Варя срхкась идень садику. Варжакстсь вальмава и кодак ювади:

– Ура! Лов! Афкуксонь лов!

Ловонь тяштенятне сргозсть и кодавок аф шарьхкодихть, мес Варя тяфта пешкодсь. А мзярда стирнясь щафтозень синь кядезонза, талакодсть – тялось сась. Варяганятне лиссть ульцяв и няезь, кода тоса пара. Но мезевок лацкас ашесть мяляфта. Варя аськолясь пяк курокста и яфиесь кядензон эса. Стирнясь эряскодсь садику, а тядяц – покодема вастозонза.

Варя сембонди группаса максозень кирдемс ляпе варяганянзон. Иттне вадерязь синь и мярьгсть, бта акша катонят. Аньцек аф мявкснихть.

Тядяц ся шиня Варянь инкса сась аф кода най, а сяда рана. И синь тусть куду паркть пачк. Келуфне, поюфне, пяшетне – сембе шуфттне щасть акша ловонь палят. Пряснон синь сотозь пиндолды лешень руцяса. Сянкса парксь  Варянди ёфксоннекс няевсь.

Псилгодсть стирнять кяденза Ловонь тяштенятнень потмоса. Лоткась, каязень и путозень зепозонза. Но варяганятне аф зепненди повсть, а вакска. А Варя афи смеказе тянь и тусь ласкозь тядянц мельге.

Ловонь тяштенятне прасть шуфтть алу – афи няевихть акша ловть лангса. Но оржа сельме сязьгатась няезень синь и лийкстась келуть пряста. Соньге мялезонза Ловонь тяштенятне тусть. Нокась пизозонза кеподемс. «Лисихть лефкскяня тунда –  вов и ляпе ацамня теест кармай», – арьсесь сязьгатась. Варжакстсь перьфпяльге и кармась шаштома варяганятнень шири.

«Мезе тяни тиема? – эводсть Ловонь тяштенятне. – Кша тяста, кша!» Ашель мяльсна салафтомс пряснон сязьгатать кядьста. Эста Варянди мзярдовок аф вешевихть. Тянивок, пади, ризнай стирнясь кудса, што юмафтозень синь. Пштядсть фкя-фкянди варяганятне и трнатыхть.

Но сязьгатась ашезь кеняре синь фатямс, эвфтезе кайги увамась. И Ловонь тяштенятнень вельхксса эвондась пинень нярь. Нармонць меки лийкстась тарадть ланг и кармась тоста ванфтома мельгаст. «Тя аньцек ашезь сатне!» – та сядонга трнатозевсть варяганятне. Равжа пинесь венептезе ни мадянц, штоба кундамс синь и колендемс мархтост. Но азороц лоткафтозе:

– Фу! Арчи! Фу! – и кулхцонды пинесь варяганятнень ашезень тока.

– Кодама тон ёнюват, пиненя! – мярьгсть теенза Ловонь тяштенятне, но Арчись ашезень куле синь.

Мзярда Варя сувась куду, эцезень зепозонза кядензон и аварьгодсь. Ловонь Тяштенятне тоса ашельхть. Стирнясь ласькокшесь меки парку, но тядяц кардазе. Шобдаста сяка синь аф мувихть.

А паркса и видекс пяк шобдаль. Сетьмость нармонень вайгяльхне. Ашесть маряв пинень уваматне и ломанень корхтаматне. Штоба улель сяда лямбоня, Ловонь тяштенятне пштядсть фкя-фкянди. Стане, ашкодозня, и матодовсть. Сай вандысь, и Варя синь вешсыне.

Омбоце шиня стирнясь стясь рана. Сон мультфильматка ашезь карма ванома, кода тиендсь эрь шобдава. Эрязста срхкась и тусь ласькозь идень садику. Тядяц – мельганза. Мольсть сяка киге, паркть пачк.

«Няфтесть прянтень, Ловонь тяштенят», – корхнесь мархтост стирнясь. Ванондсь эсост шуфттнень алда и кусторкснень потмоста, конат кить крайге кассть. Тядяц мархтонза вешендсь.

– Вов тинь косотада, ямбарнят! – цяпазень кядензон стирнясь.

Юмафтф варяганятне ащесть и учсть азорснон эса келунять ала. Варя кеподезень, шукадезе лангстост ловть, ванозень лацкас – пади кивок обжазень синь? Ловонь тяштенятне ульсть апак токак. Синь арасть та сядонга ляпонят и мазынят. Пяк ни кенярдсть варяганятне, што Варя синь музень.