Сембодонга цебярь щаваня

/Мокшанский язык/

Изображение: рисунок Е. Колмаковой.

–  Ватта, щавай, сон тага тяса! – пшкядсь сисем кизоса цёрокшсь щаванцты и тердезе вальмяти. Но тона маряйкска ашезь тие. Щавась штась куцюфт и сюконят шобдавань ярхцамда меле и сюцесь «мациень сялдазть» эса. Тяфта Денискать щавац лемдезе кухняса ведень нолдама кранть. Вов ни киза, кодак сон ётась велеста пялост эряма, а «мациень сялдазть» кодавок аф тонадсы. Шарфтсы кранть «пацянянц» эсь ширезонза – лакай ведсь пидесыне кядензон. Пувордасы эсь эздонза – кельме ведсь пакарькс суронзон тисыне.

–  Тундань прафсь сяволензе! – вов и тянивок щавась сюцесь «мациень сялдазть» эса.

Денискась ащесь озада вальмялангса и ванондсь ульцяв. Щаванцты сон няфтекшезе эсь кизосонза стирнять, кона якась вальмаснон алга и снимандась телефонозонза эрь кодама лопанят и панчфкат. Тя цёранять щавац видезень синь тунда. Тяни панчфне кеподсть и панжихть эрь кодама, кеняртьфти сельмованф, тюсса.
Комай панчф прянять каршес стирнясь –  «щёлк-щёлк!». Кеподьсы сянгяря  панчф лопанять и тага – «щёлк-щёлк!».  Ванцыне тоса снимканзон и пееди. «Мазыста лисендихть щавазень панчфонза», – арьсесь Денискась, ванфтомок стирнять мельге. Васенце этажста лац няеви.

Кизонь шинясь сонць кельксезе панчфонь снимандай стирнять. Светясь акша шяярензон лангс, и Денискати синь няевсть, бта зърнянь тюссот. «Тя афкуксонь фея! – мярьгсь эсь потмованза цёранясь, – и лемоцка сонь, улема, аф сембонь лаца, а феянь».

Кода пара ульцяса! А тяса нинге ялганза пуромсть. Финцне лихтезь кафта шарыса кшнинь айгорняснон, омбоцне щафтозь пильгозост шарыня лангса соксснон и дразнясть Денискать эса. Цёранясь кельмофтезе кргапаренц, сяс ащесь кудса и ванондсь вальмава, кода весяласта арнесть и курькснесь ялганза.

Афоль уле кудса щавац – ворьгодель ни. Денискать тожа улихть шаряня лангса соксонза. Аф кунара аляц рамазень. И цёранясь ни тонадсь аф аньцек лац ащема лангсост, но и курькснема. Вов синь и муворуфне.
Щавац сонць пчкафты унокть эса, а сияк аф юкснесы сюцемс копорь фталга рузонь овонц, Денискать алянц:

–  Мезе повсь рамай шабати! –  корхнесь эсь мархтонза щавась, нарнемок штаф куцюфнень эса. –  Ну мезенди эрявсть тя шарыня лангса соксне? Пильгонь синнемс и кргапарень кельмофнемс? Стане вдь уноконяй? – и кучсь ужяльди ванф Денискать шири.

Цёранясь арьсесь, мезе азомс щаванцты. Кда кирдьсы сонь, тона курокста кяшсыне соксонзон и шабась вестевок синь аф няйсыне. Кда мярьги, што муворуфне аф синь, а кафта мороженайхне, эста та сядонга пови. Колма шида инголи Денискась ялганц мархта курькснемда меле рамсесть вафляса ашкотф кельме танцтинят. Цёранясь сивокшезе аньцек фкянять, а омбоцеть кандокшезе щаванцты, но ашезь кирде и тонаньге нилезе. Пяк ни танцтиель мороженайсь!

А тяни Денискась синнезе прянц, мезе отвечамс щаванцты. Визькс ульсь видемцямс, мезенкса сон кельмось. А та сядонга визькс ульсть сянкса, мес сон ашезь када щаванянцты мороженай. «Кодак пчкан, анан тядязень кядьста ярмак и щавазти раман нльне кафта, – тяряфтсь сетьмофтемс эсь прянц Денискась. – Аф, кафтсь кржа ули муворксозень идемс.Колма!»

Щавась шумордазень тевонзон и маладсь вальмяти.

– Мезе тоса тейне няфтекшеть? – кизефтезе сон уноконц.

– Вов тя панчфонь кельги стирнять! –  мярьгсь Денискась и сурса няфтсь панденятнень лангс.

Цёранясь арьсесь, щаванцка мяльс стирнясь туй. Но тона варжаксть вальмава и кяжиста мярьгсь:

 – Аф панчфонь кельги, а панчфонь тапай стирня!

Тоса панжезе вальмять и ювадсь:

– Месть якат вальмятнень алга? Мезе тоса вешендят? Листь тоста и тят тапа панчфнень эса!

Зърнянь шяярь стирнясь нльне комотсь  (сяшкава эводсь) и телефононцка кядьстонза прафтозе. Тоса кеподезе и кяшсь кудть бокс.

– Щаваняй, мезенди тон феять панить? – обжавсь Денискась, – сон сашенды эрь шиня и панчфнень эса ёфси аф яжай и аф срафты.

– Аш месть феятнень тонафтомс  тяза, – отвечась щавась. – Тячи панчфонь пандть лангс, а ванды вальмавага сувайхть!

А сонць, видеса азомс, афи содазе, кит тя феятне.

Панчфонь мельге якамась – Денискать щаванц тяни ульсь тяконь сединь ваймафтома тевоц ошса. Инголи сон эрясь велеса. А мзярда кулось тостонь мекольце эряйсь и щавать корхтай ялгац, Проса бабась, Денискать тядянза-алянза сявозь сонь ошу. Аф лафча ульсь тя тевсь. Цёранясь мяляфтсы, кода синь сембе марса ужяльдезь эняльдсть эсонза ётамс эряма пялост.

– Месендян тоса ниле стенатнень ёткса? – ашезе макса прянц щавась. – Аф сараскат аф кирттяда, аф модамарнят аф озафттада. Кулома сявсамасть?

– Тядяняй, кода ськамот тяса эрят? Седизень эса сязендят! – корхтась эсонза Денискать тядяц.

– Раиса Ивановна, визькс тейне ломаттнень ингольде кармай! –  поладозе эняльдемаснон цёранять аляц. –  Мярьгихть, рузонь овоц щавать ёфси аф ужльдьсы. Ну срхкак ни, тямак тие муворукс аш мезенкса…

– Аф молян! Хуш керсемасть! – ащесь сонценнеть лангса сире ломанць.

Надиясть тяни аньцек Динискать лангс. Уноксь ашкодозе щаванц и мярьгсь:

– Сембодонга цебярь щаваняй! Най кулхцондомот и мяльцень ванома карман. Обжамс киндивок аф максте!

Ляпомсь щавать седиц, срхкафтозе паршинянц и ётась иттнень пяли ошу. Уноксь кельгозе щаванц, а сон – унокть. Фкя-фкянь ужяльдсть и араласть Денискать тядянц и алянц ингольде. Но тячи цёранять ваймосонза бта катот кськорясть. Мес сон стакащемда панезе стирнять?

 Участковайть – тя да, ульсь мезенкса «понанц сехтемс». Тонадсь машинанц цють аф панчфонь панденять лангс путнемс. Машинаста лисемста – пяц ботинканц панжи панчфкять лангс. Щавась смеказе, лиссь и кармась сингорямонза ломаттнень ингольде:

– Тонць милицият, – мярьгсь, – а тяфта тиендят. Аф визькс?

Тонац якстерьгодсь и простямань валхтка анась. Оду тяфта ашезь тиенде. А ломаттне ся пингста сявомок кармасть пеедезь корхнема, што участковайкс аф сон, а Денискать щавац сяда ладяй.

«А тяни сон аф пяк лац тись», – арьсесь цёранясь, но этеенза валнявок ашезь аза – пельсь обжамс.

 Щавась пульхксь шрать ваксса, срхкась обедонди шонгарям пидемс. А Денискась панжезе вальмять и кайгиста ювадсь:

– Фея! Фея! Тон косат?

Щавась сюцекшезе ни унокть, но няезе, што сон стадонга ни обжаф «панчфонь тапай» стирнять инкса. И ашезь карма.

– Мон аф феян, а Ульянан! – сувась панжада вальмава стирнять горняй пайгоня лаца вайгялец. – А феясь – тя тонь щаваце. Тяфтама мазыши касфни! Мон марнек альбом ни кочкань. Снимандасайне панчфканзон и путнесайне интернету. Катк сембе ванондсазь и кенярдихть.

Щавась, марямок стирнять валонзон, карьхканцка прафтозе кядьстонза. «Сонць ёмланя, а кода видеста корхтай», – арьсезевсь сире ломанць. Нардамок кядензон, сяльде маладсь вальмяти и ляпоняста пшкядсь:

– Тят пеле, уноконяй. Сашентт тяза. Сашентт эрь шиня. Кинди мле озафнеса тя мазышить, кда аф теентть – уноконяненди-матаняненди.

Стане кенярдсь Денискась! Щавац тожа шарьхкодезе, што тя аф сембонь лаца стирня, а панчфонь фея. Хуш сонць панчфонь кельгись и ашезь виденця.