Юмаф сёкт

/Мокшанский язык/

Изображение: рисунок - журнал "Якстерь тяштеня".

Сёксесь якай кудста кудс и чакай ломаттнень вальмас. Прязонза – пизелонь каштаз, лангсонза – сёксень тюсса сёрматф панар, а петьксонди теенза полатфт тюжя лопанятне арасть. «Срхкада лямбоняста, тя вдь теенть аф киза!» – то тяса, то тоса кулеви тяниень пингонь азоравать вайгялец.

Октябрсь ни аделавома лангса, но тячиень шись сяшкава лямбе и менельсь сяшкава ару, што, мярьгат, кизось меки мрдась. Денискась весяласта аськоляй школаста куду, копорьсонза  – рюкзак. Псилгодсь, мяндезень курткастонза пунятнень. Вов ни омбоце ковсь цёранясь якай васенце клазу. Щавац афи кенери мельганза. Сатсы и тяряфты валхтомс лангстонза оцю рюкзакть, лездомс уноконянцы:

– Эрь, тяни мон кандса! Тяшка сталма эрь шиня вятерьфнят!

– Щавай, а тейне аф стака. Мон вдь алян! – азсы Денискась и та сяда эрязста туй.
Кудса учихть эсонза щаванц пяряканза капстань потмоня мархта. Эхи танцтихть!
 
Ёмла алянясь ськамонзовок якаль школав, а школаста куду. Кить содасы лац, и шоссеть ётамац аф стака. Маладат, лоткак, учт, мзярда крьвязи светофорть сянгяря сельмоц, и аньцек эста инголи. Но щавац пели уноконц ськамонза нолнемс. Сон сембе эряфонц ётафтозе ёмла веленяса, коса китнень ланга аньцек тракст якасть, а машинат аш, да нинге тняра! Тяни щавац ётась пялост, ошу, и сонць анась пря вятнемс уноконц кудста школав и меки.

– Да вдь тяфтак ащезь сизят, – отвечай най щавась, мзярда Денискать тядянза-алянза ужяльдезь кадыхть бабать эса куду. – И шабаське пелькс ськамонза нолдамс, машинатне лиезь лиихть!

Марса – катк марса! Цёранясь аф каршек, кда щаванянц мялец мархтонза школав и школаста якамс. Молембачк сон азондсыне теенза сембе кулятнень, мзяра «ветеда» Нина Николаевна теенза путсь, мзярксть шназе. Бабась аньцек пееди, пара мялезонза.

Вов и тяниге, лятфтамок, мезе надияфтсь теенза тонафтысна, Денискась лоткась, учезе щаванц и мярьгсь:

– Ванды, щавай, Нина Николаевна тейнек ётафты мялень салай урок.

– Кодама тя стама, мялень салай? – кизефтезе бабась.

– Народонь ладаяма шити! И тоньге тердензе!

– Монь? А… а монь мезенди? – абондсь Денискать щавац.

Цёранясь кармась кепотьф мяльхть азондома, мезень тя ила. Нина Николаевна выставка кочкай эрь кодама нароттнень сире пингонь щамснон колга. Рузонь кокошникть и сарафанть сембе содасазь. Но клазсост синь аф аньцек руст тонафнихть. Олесянь тядянза-алянза Беларусьста, сон канды «намитка» (тостонь аватне сонь прязост путнезь) и сёрматф нардама. Руслан пачфти папаха, синь Дагестанцта састь. Корхтай, кудса буркасновок ули, но тонафтысь мярьгсь, папахасье саты, буркась – тя вдь ожафтома ор, а сяшкась разе выставкати тяльги?!

– Щавай, а тон няфтить пайгоня и рака кудня мархта сёкнень, – кивок  синь вдь афи няендезень! Мон ни надияфтонь Нина Николаевнанди, што тон саят и тонць азондат колгаст, – мярьгсь Денискась и сявозе щаванц кядьта.

– Кда ни надияфтоть, то сама, – азозе щавась, а сонць кармась арьсема, конашкава цебярь ила тяни школаса кармасть ётафнема – нароттнень ёткова ладяма ши…

Денискась тиезень вандыенди уроконзон и аноклазе рюкзаконц. Щаваське тусь аноклама. Таргазе шкафста сюлмонянц, палазе. Тоса кочкафтольхть мокшень панароц и щамонь мазыптомкатне – бабать инь питни паршиц. Велеста мархтонза ускозе. Юксозе сюлмонять – и кодак пешкоды:

– Вай кравул! А омбоце сёкне косот?

Ласьксь вайгялезонза Денискать тядяц, аляцка прянц комнатав тонгозе.

– Тядяй, шять, тонць юкстайть омбоцеть путомс, мзярда пялонк эряма срхкать?  – сась стиренц пряс мяль.

– Мон хуш и сиренян, но прязень мархта нинге ладян, – нльне обжавсь бабась.

– И савсь тяшкава, Раиса Ивановна, тянкса пичедемс? – азозе панжада кенкшкава руз овоц, – кали фкясь аф саты?

Щавась шукадезе прянц и мярьгсь:

– Нармонть кафта пацянза, фкаса аф лиеви. Стане и мокшавась. Сама киське ошезонт афоль уле, тяса аф аньцек сёкнень, а тонценьге салатядязь! – бабась ашкодозе сюлмонянц и кармась явсема.

Мзярс оцюфне синнезь пряснон юмаф сёкть перьфкя, Денискась ашезь кашторда, ащесь – ронгоцка стенати педсь. Аньцек сон ськамонза шарьхкодезе, коза сёксь тиевсь. Тона неделять сашендсь пялонза ялгац Максим сазорнянц мархта. Щавась эста поликлиникав рецептонкса тушендсь. Цёранятне тисть кош, индеецокс колендсть. А штоба ёмла Светанясь афоль шоря теест, Денискась таргазе инголенза щаванц сюлмонянц. Но сявсь  кядьстонза вал – аньцек ванондомс сёкнень и крганятнень и кядьса аф токсемс. А стирнять сяшкава мялезонза синь тусть, сявсь и прдазе фкять няканянзон ёткс.

– Щаваняй, тя мон муворусь! Тят пичеде, вешсаськ и мрдафтсаськ аф саты сёкть, – лиссь нолдаф прят эсь уженястонза уноксь и виденцясь.

Омбоце шиня школада инголи Денискась щаванц мархта токасть ялганц пяли. Максозе Светанясь сёкть, аварьгодсь нльне. Кле, афи фатясь, кода тя мазыптомкась няканзон ёткс сонць кяшсь. Бабась ашезе сюце – кенярдсь пяк сиренясь, што тяни кафцьке «пацянза» улихть.

Ладяма шити урокть Нина Николаевна ётафтозе васенцекс. Денискать щаванцты учемска ашезь сав. Пяк цебярь выставкась лиссь. А мзярда тонафтысь тердезе клазть инголи Денискать щаванц и тона таргазень сюлмонястонза мокшень нарядонзон, иттне озама вастстостка снисть. Синь пуромсть тонафтыень шрать ваксс. Эрь шабать мялецоль кядезонза сявомс дингольди сёкнень, лацкас ванондомс рака куднятнень и пунянятнень лангсост. Стирнятне прафтсть сельме эрь кодама тюсса крганятненди.

Щавась ацазе шрать лангс мокшень панаронц. Шить сюролданза вальмять пачк налхкозь налхфтозь и та сяда пиндолгофтозь петьксонц. Панарть лангса сёрматф атёкшне и панчфне бта эрекласть и эвондасть синцень мяльсна сяда лацкас няфтемс шабатненди эсь мазышиснон.

Выставкась пяк удалась. Нина Николаевна кемокстазе урокть мяльса, што Россияса эряй нароттненди эряви ладямс фкя-фкянь мархта и сяда лама содамс фкя-фкянь колга. Денискась кулхцондсь и пяшксе седихть кенярдсь щаванянц инкса: и сёконза мувсь, и мокшень щамть мазышинц няфтезе.