Пели тиграт и аф пели нумол

/Мокшанский язык/

Изображение: рисунок Е. Лошаковой.

Колма ялгат мольсть куду школада меле паркть пачк. Колмоксне эрясть аф изчкозе фкя-фкянь эзда, тонафнесть фкя класса, сяс и якасть фалу марса.

– Ареда зверень лепт шабатненди арьсетяма, – мярьгсь сембода отькорсь эздост, Костя Храбровсь. – Кие кинь лангс шарфни, стане и карматама эсь ёткованк лемнемонза.

– Ареда! – эстокиге кирдезе сонь Никита Мясниковсь.

Колмоце ялгась, Владик Виноградовсь, мезевок ашезь отвеча, лафтувонзон аньцек кеподезень. Серес сон ёмланяль, сяс сембе урокса ащесь васенце партать ваксса. И мзярдовок ашезь эце ня кафттнень ёткс. Синь озадотольхть класса мекольцеть ваксса и най арьсекшнесть мезе повсь.

– А Кузнецовась келазькс кармай! – мярьгсь Костясь, мзярда сембе стирнятнень и цёранятнень пакарьснон штазь-нардазь.

– А мес тяфта? – кизефтезе Никитась. Сон фалу Костянь кирделезе, хуш тона сидеста аф лац тиендсь. Но тяни спорясь мархтонза, сяс мес Танясь пяк мялезонзоль. – Сонь вдь аф рыжайхть, а акшет шяяренза…

Костя варжакстсь ялганц лангс и шарьхкодезь куфкстсь. Кие-кие, а сон содазе, што Никитась кунара ни панцесь тя стирнять мельге. Тоса поладозе:

– Ёжу сяс мес! Спектаколень анокламста лиятненди «яга бабань» рольхть явонды, а эстеенза «ловонь стирнят» и «принцессат» кадонды.

Мезе ба афоль тие Кузнецовась, Никитанди кальдявоц ёфси ашезь няев.

– А минь кикс мархтот ульхтяма? –  эрязста ётафтозе корхтамать «келазть» лангста цёранясь.

– Содаф тевсь – тигракс! – отвечась Костясь. Тескафтозе мокшендаса мяштенц и рназевзь.

Сон бта эстакиге тигракс арась  – стане вихонзась, што цёранятне афи кенярсть мельганза.

– Монь фамилизевок ладяй – Храбров! Рузонь кяльста – мезьдовок аф пели. А тигратне вдь тяфтапт. Тоннеське ладяй – Мясников. Мезьда тигратне ярхцайхть? Палда!

– Кода лац арьсеф! – шназе Никатась. Сонь пяк мялезонзоль тигракс улемс. – А Владиксь кие?

– Сон нумол, – отвечась Костясь и кафта сурса няфтсь нумолонь пилет.

Владиксь, кона тяпингс куликска ашезь тие, эреклась. Мес шта сон нумол? Фамилияцка аф нумолонь, сельмонзовок ваныхть инголи, а аф кафта шири…

– Сетьмоста пряцень пяк вятьсак, Владян. Кинь инкса футболса сяськомазь, а? Аф араламонза топть, аф нельгомонза аф маштат.

Азомок ня валхнень, Костя ушедсь пильгса мйнефнема коське лопа мархнень. Тяфта сон Владикоди няфнезе, кода топсь вятема.
Тонань аф лад мялезонзоль, сяс мес Храбровсь фалу лятфнезе ся матчть и визделгофнезе цёранять.

Магазинтть ваксса ялгатне лоткасть. Синь най тоса явольхть. Тянивок тяфта тиекшесть. Но коста-бди эвондась камбаряф пона ката лефкскя и нлнфтсь ширезост. Мельганза – айгоршка пине!

Костя Никитань мархта вармакс лийсть магазину. А Владиксь кеподезе трнаты каталефксять, кяшезе куртканц потмос и сёлгозень сельмонзон. Мезе ули – ся и ули. Пинесь ардсь вишкста, увась, а кирдемань шнась усковсь мельганза.

– Фу, Бигги! Фу! – кулезе цёранясь пинеть азоронц вайгяленц и аньцек эста панжезень сельмонзон.

Мзярда алясь кундазе пиненц, «тигратне» лиссть магазинцта.


– Нумол и улят нумол! – мярьгсь Костясь. – Реакцияце ёфси аш!

– Аф стак тяфта лемдедезь, – поладозе Никитась, – петема и петема характерце.