Луга лангса

/Мокшанский язык/

Изображение: рисунок www.illustrators.ru

Сргозсь кизонь шинясь, венептезень вяри кядензон-сюролданзон. Тоса озась коволнять лангс и кармась эжнема луганять эса.

Васенцекс кеподезь пряснон ромашкатне, петезь вазьснон-шляпаняснон. Кучкасна синь сембонь тюжянят, а перьфсна акша лопаняса мазоптфт. Кодак няезь розьбанчфне, шабрасна стясть, синьге тарозевсть. Сюконяфтозь сенем пряняснон и шумбракстсть сембонь мархта.

Кулезь фиалкатне – панжевсть анютань сельмонятне. Тя синь обмоце лемсна. Ули тюска тяфтама – фиалкань. Вакссост няфнесыне тюжяста панжи пайгонянзон иван-да-марьясь, сембодонга кельговись шиняти. Лия луга панчфнень лопасна сянгярят, а тянь – сенепт. Ваны лангозонза шинясь, и бта эсь тюжя прянянц сенем менельть лангса няйсы.

Лийкстасть лугать лангс прамошне, кендихне, мешне, унжатне – бзнайхть. Пезфтасазь салмоксшка нярьняснон панчфнень кучкас и симихть ламбама нектарда. Таааааанцти!

Топодсть кендихне, куцсть инь оцю ромашкать кучкас, бта сценати, и кармасть пряснон эса сембонь инголе шнафтома:

– Ваносте, кодама мазыхть минь щамняньке! Китькскяня мархтот! А тинь тяфтамонте аш!

– Аш и афи эрявихть! – азозь прамошне.  – Тяфтавок цебярьхтяма, сяс мес сембода виихтяма и тазатама. Эк мзяра эзонк тяльги! – и няфтезь оцю пекснон.

– Тяфтама парьнятнень мархта ичкози аф лиефтяда, – рахазевсть унжатне, – сельгонь прамс тинь саттядязь. Отькорьхне и вишкста лиихне – тя минь!

Мзярс паця лангса инжихне эсь ётковас спорясть, мешне пряснонга ашезь кепсе. Лиендсть фкя панчфкаста омбоцети и куликска ашесть тие. Учсть-учсть кендихне, лопадсь кирдемшкасна и мярьгсть:

– А мес шта мешне кашт аф молихть? Содаф мес… Аф мазыхть.

– Сюла пенят синь! – мельгаст азозь прамошне и няфтезь эсь фаф мускуласнон.

– Лиембачк удыхть! – поладозь унжатне и заводязь пацяснон-пропеллерснон.

Кулезень шнафтыхнень шинясь, ювадсь теест менельста:

– Вай-вай-вай! Кода теенть аф визькс! Мешне – сембода трудонь кельгихть и паронь кандыхть, сяс мес синь аф аньцек эсь колгаст арьсихть. А тинь содатада, пеке шиньберьф топафттада.

Мешне эстовок пряснон ашезь кеподе, тевснон ашезь када. Синь тяряфтсть сяда ламне кочкамс нектар, а тоса кандомс мешень куднязост. Ётай кой-мзяра пинге, и кочкафсна арай медькс – инь цебярь надобьякс оцюфненди и иттненди кельмофтемать эзда.