Ёфксонь азонды штатол

/Мокшанский язык/

Изображение: рисунок: Е. Колмаковой.

Обедта меле Денискать тядянза-алянза срхкасть ошу концертс симфониянь кулхцондома. Ашесть кеняре лисемс кудста, кода тусь вии пизем. Сяшкава шавсь вальмяти, мярьгат, почкафтсы клянценцка и куду лознефти.

– Ну кодама тяни нужанте тяфтама пизембачк молемс? – мярьгсь Денискать щавац и маладсь вальмяти. – Прянек-пильгонек начктада!

 –  Мезевок аф тият, Раиса Ивановна. Билеттне кунара ни рамафт,  – пшкдядсь теенза руз овсь и чупазе зепонц.

Руз овсь – тя Денискать аляц. Тяфта фталганза щавась мярьги. А тона ёфси аф кяжияй, сяс мес мокшекс тяльхцявок аф шарьхкоди.

Денискать тядяц пункстазень плащень пунянзон, палазе цёранц касомти и шуроста (арьсесь тяфта сяда теенза пачкоди) азозе:

– Щавацень кулхцонтк. Тят юкста лувомс книгаста пялькскять и сёрмадомс тетрадти. Саян – няфтьсак.
 
Сявозе зонтиконц и тусь ласькозь мирденц мельге. Чак-чак-чак каблуканянза куцеманятнень ланга.

«Аф сяка бта концертсь телевизорса моли», – мтрдсь Денискать щавац. Нолдась кодама-бди передача и кармась кулхцондома. А сонцень сельмонза кодаманцты пезфтафт. Вендернятне кштизь-кштихть кядьсонза – стане курокста якайхть. Мярьгат ёмла, киндивок аф няеви, батарейканят петьфтафт эзост.

Денискась озакшесь ни щаванц ваксс, но лятфтазе тевонц. Курок школав, васенце классу. Лувома цёранясь лац маштсь, лочазь-лочай, кода корхтай щавац. А вов сёрматфоц кокольдсь. И Денискась озась шранц ваксс кокольди букванзон петема.

Книгаста пялькскясь ульсь мялень салай и тёждя – вирень ракшатнень колга. И букванзовок лиссть виденят, аф кичкордыхть. Сюнера, аврди менельсь курок шоптьфтезе ушеть, и цёранясь крьвясть тол.

Денискась тяштсь ни мекольце валгярьксть эса, кода кулезе щаванц вайгяленц:

– Ваттака, уноконяй, мезе тяса няфнихть!

Цёрокшсь ласьксь телевизорть инголи. Эхей! Мольсь кельгома передачац лия материкса эряй зверьхнень колга! Озась щаванц ваксс и келептьф сельмот кармась ванома. Африкать няфнезь, кода тигратне тоса эряйхть. А иднясна кодама откорьхть! Коза аньцек аф эцихть – роди аф кулхцонды ёмла шабанят.

Тоса Денискась няйсь буйвол-буканя тядянц мархта кусторкснень ёткса. Авака тигрась смеказе ёмла буканять и кармась панцема мельганза. Ёрась явфтомс оцють эзда. Тядяц шарондсь иднянц перьфкя, аткарясь тиграть кеме сюронзон мархта. Буканясь ащесь тары пильгонянзон лангса и эводезь парась.

Цёранясь пштедсь щаванцты, ваймонцка пельсь таргамс – сяшкава пичедсь буканять инкса. Аралави тядянцты или аф? Щавацка ванць – афи чипордай. Кодаманцка кадозе.

– Эрьхтьк сюроса лацкас! Тескафтк коняти пильгста! – тонафтсь щавась, бта валонза пачкодихть буйволхненди и лездыхть.

Но тигрась ярхцамбяльфтема мрдамс куду ашезь срхка. Сон сонцень вачеда иднянзон колга арьсесь. И та сяда кяжиста  кармась врьгятема и пезфнема оржа пеель лаца пеензон тядя-букать копорьс.

Буйвол-тракссь паразевсь и… и тяса мадсь толсь, а мархтонза и телевизорсь.

– Шяйтатне! Тага навамазь шобдати! – кяжиста мярьгсь щавась, – тят пеле, уноконяй, молян штатолня вешан. Вай, а мес трнатат?

Денискась шобдада ашезь пеле. Аф васенцеда вдь кудсос
т тя лиссь. Сон пельсь бйвол-буканять инкса, што аф няйсы, мезе мархтонза кармай.

Щавась крьвястсь аф оцю штатолня. Но сонь валдоц  сяка сатсь теенза смекамс, кода элякодсь уноконяц, кельгомнясь-тяконясь. «Ляпе сединя касы, – арьсесь бабась и вадерясь Денискать  прянц.

– Щавай, а буйвол-тядясь вдь аф макссы иднянц тиграти сязендемс? Саты вдь виец араламс? – сетьме шуваня вайгяльняса кизефтезе цёранясь.

–  Аф макссы! Щафтсы тиграть сюронзон лангс – тонац  курокста мусы эсь пенц! – надияфтсь щавась и нльне прянц мархта няфтезе, кода тевсь кармай. – Тяфта аф уленди, штоба тядятне идьснон кадондолезь, а синць ворьгодельхть.

– А тон коста содасак?

– Ёфкс тяфтама ули, кулхцонтт.

И Денискать щавац ушедсь азондома:

– Фкя туста пиче вирьса эрясь вирьбукань тнал. Якасть най марса, штоба врьгаснень пейснон алу аф повомс.

Цёранясь кунцезе бабать эрь валнянц, кулхцондсь стяда пиленят. Теенза арам, аф щавац, а светяй штатолнясь ёфксть эса азондсь.

– А весть вирьдракссь ёмла буканянц мархта явсть лядыхнень эзда, – поладозе ёфксонь азонды штатолсь. И Денискати пачфтезе, кода ванфтозь синь и кармасть куродомост врьгасне. Тядять ни маштсть виенза тюремс мархтост, прась и стакаста парась. Но ляды вирьбукатне кулезь эняльдить вайгяленц, ласьксть и каяфтозь врьгаснень кедьснон.

– Щавай, но тя вдь ёфкс! – мярьгсь Денискась, мзрда штатолсь  –цёранять щавац, азондомда лоткась.

– А коста, арьсят, ёфксне сявондевихть, а? Эряфста! Ломаттне мезе няихть, сянь колга и ладяйхть. Аньцек поладыхть эсь эздост цютькя – вов тейть и ёфкс.

«Пароль ба, штоба и буйвол-буканяти тядянц мархта куроконе лезкссь  саль», – арьсесь Денискась.

Тяса валдомсь кудботмось, и телевизось тага кармась няфтема сяка передачать. И мезе цёранясь няи? Марнек буйволонь стадась кочкавсь ся вастти. Кяжиста якафтсазь кафта пяли сюроснон и шавихть пильгса модать эса. Тигрась, кяшендезь, потай, а сонць нолсесыне сюроса пяльф вастонзон.

– Мярьгонь вдь тейть, аф юмай буканясь! – щаваське кенярдсь буйволхнень инкса.

– И тядяцка вакссонза! – поладозе Денискась и аньцек тяни тёждяста таргазе ваймонянц.

– Вов вдь кода, уноконяй, и ракшатне, и ломаттне, кда синь марсот, кодамовок тигранди и врьгазонди аф сатовихть, – мярьгсь щавась. И сонценьге нльне мялезонза тусь, кода лац азозе. – Ну а тяни мадома!

Денискась аньцек путозе прянц тодуть лангс – этокиге и салазе онць. Аф щаванц сей-тов шаштомац, аф тядянц и алянц концертста самасна – мезьське ашезе стяфта. Цёранясь удось сетьме павазу онца. Вдь кафта буканятнень мархта, конатнень инкса тяшкава таколдсь сединяц, мезеньге кальдяв ашезь лисе.