Китьксу чемодання

/Мокшанский язык/

Изображение: рисунок: А. Кочуровой.

Фкя ошень квартираса, шобда шкафса, ащесть колма чемодатт и корхнесть. Васенцекс вайгяленц нолдазе сембода оцюсь, сенемсь. Сонь азороцоль Алисань аляц, Павел Петрович Белкин:

– Кие содасы, коза тя кизоть отпускс мольхтяма?

– Кати мольхтяма, а кати аф, – ушедсь куфкснема корязонза сяда ёмлась, якстерь чемоданць. Сонь рамазе эстеенза Алисань тядяц, Светлана Ивановна. – Павел Петровичень директороц ёфси аф нокай нолдамс. Кле, аш кода соньфтемонза, тяфтама ёню инженерфтома.

–  Эста дачась аньцек и ляды, – аф весяласта пшкядсь сенемсь.

Сембода ёмлась, китькскав чемоданнясь кулхцондсь эсост стяда пиленят. Кодак кулезе «дача» валть, вастстонзовок комотсь и пешкодсь:

– Коза повсь, аньцек аф дачав!

Тоза эсь мархтонза Алиса сонь аф сявсы. Путсы паршинянц рюкзакти, а сонь куду кадсы. А ёмла чемоданнясь стане кельгозе ичкози якаманц! Весть сон ардсь поездса. Эхи пароль! Но сядонга тусь мялезонза самолётсь. Кали Алисань аляц аф корхтасы директоронц?

Корхтазе. Чемодаттне шарьхкодезь тянь, кодак азорсна кармасть эсост срхкафтома кис. Алиса пряда пяшкодезе чемоданнянц. А мзярда эфцедезе эзонзаТига-Бига ляпе тигранянц, фавсь арзянясь и та сядонга кармась шарфнема кенерьф арбузть лангс.
Сонць сянгяряль, а лаганза мольсть равжа китькскат. Тяфтама жа круглайкс арась.

«Аньцек ба аф лопадемс», – мтрдсь эсь потмованза чемоданнясь, мзярда Алиса кодавок пункстазе и сёлгозе панжемаса.

Аэропортсь пяшксель эрь кодама ломаньда и чемоданда. «Др-др-др!» – ардсть оцю шары лангса айгоршка арзятне. «Вжик-вжик-вжик» – комотнесть ёмла шаряняснон лангса иденнетне. Кодамот аньцек ашесть ёта Алисань чемоданнянц вакска! Финцнень лангса рисавафтольхть пони-алашанят, омбоцнень – Микки-Мауст, а колмоцнень – принцессат. Но сонь лацонза китькскя мархта «арбузнят» ашельхть.

Мезень колга аньцек ашесть корхне чемодаттне лиембачк самолётса! Оцюфне шнафтсть фкя-фкянь инголе пря, коста рамафт и мзяра питнеда. Иденнетне азондсть, кодама налхкшт эсь потмосост синь усксь.

Кодавок пачкодсть! Тяни куроконе повомс азорснон кядьс. Пассажирхнень ёткста, конат учсть багаж, чемоданнясь ичкозде нинге смеказе Алисань. Кенярдсь. Но тяса сонь фатязь кодама-бди аф содаф алянь кяденза и валхтозь конвеерста. Сяльде ласьксь Алисань сереса цёрашаба, вадердазе кядьлапошса и мярьгсь:

– Молодецат! Лац пачкодеть!

Сятфтозе чемоданнять шарынянзон лангс и «вжик-вжик-вжик» сявозе мельганза.
Павел Петрович кундазень ни кафцьке оцю чемодаттнень, лядсь Алисань «арбузняц». А вов и сон! Мекольцекс «уйсь» конвеерть ланга, шарондсь кафта-пяли.

– Аха! Повоть! – кеподезе сонь Павел Петрович и ладязе оцюфнень каршес.

А стирнясь шарозе, ванозе чемоданнянц и пшкядсь:

– Тя аф монне!

–  Видекс, аф тонь, – шуказезе прянц Павел Петрович, мзярда кундаманять лангс петьфтаф каготкять лувозе. Тоса тяштьфоль: «Тимофей Караваев».

–  Аньцек тя тейнек и ашезь сата! –  машнезь мярьгсь Светлана Ивановна и кафта кядьса кундазе прянц.

Алиса тядянц мархта лядсть оцю чемодаттнень ванфтома, а аляц тусь аэропортса покодиень вешендема. Теест аф синценнесь аф эряви. Китькскав чемоданнять мархта Павел Петрович кадозе и отельснон адресонц, коза мрдафтомс стиренц паргонянц, мзярда муви.

А Тимофей Караваевонь прязонзовок ашезь сашенда мяльсь чемодаттнень тапарямаснон колга. Сон эряскодсь куроконе пачкодемс, таргамс масканц и ластанзон и чёпафтомс ведти – крабонь вешендема.

Куднясь, коза ускозь Алисань «арбузнянц» Караваефне, ащесь моря берякть лангса. Пефтома сенем мазыши! Ичкозе-ичкозе чемоданнясь няйсь акша карабляня. И чайкат, конат лиендсть вельхксканза. Алиса сонь вестевок ашезе сявонде морять ванома, най отели кадондозе.

Пяк дивандазевсь и абондсь Тимофейсь, мзярда теенза ашезь панжев чемоданнясь. Панжемась аф тяфта, аф ста ашезь ладя. Сяльде аляц, художниксь Сергей Николаевич Караваев, лувозе кодама-бди Алиса Белкинать лемонц. Тяштьфоль англань букваса и кундаманяти петьфтафоль.

– Пачкодеме…– китнезе касомонц цёранясь, – мезе тяни титяма, аляй?

– Мезе-мезе! Петьсаськ ситуациять, – отвечась Сергей Николаевич и гайфтсь аэропорту.

Мрдафтф паршить мельге ваны покодись азозе Белкиттнень адресснон. Алисань чемоданняц ни кенярдсь, но алят-цёрат ашесть эряскода. Ласькфтезь оцю чемоданцнон кудняв и комотсть моряв. «Арбузняти» берякста лац няевсть, кода синь тоса уендсть и колендсть. Сергей Николаевич стяшендсь кядензон лангс и якась тяфтане ведьге. Сяльде лафтувонц туркс кармась ёряма цёранять моряв. Тона лиси и ювади:

– Аляй! Яфодемак тага веськат!

Цяфайхть, валондыхть фкя-фкянь, шутендайхть! Улельхть чемоданнять кяднянза  – цяпаль ба теест. Сяшкава кенярдсь инксост!

Отельти, коза лоткасть Белкиттне, алят-цёрат пачкодсть курокста. Павел Петрович и Светлана Ивановна тарксесть чемоданцта паршиснон эса. Алиса куфкснесь и ванондсь вальмава. Коса тяни сонь «арбузняц»? Кенкшти чакамась комотьфтезе стирнять вастстонза. Талакодсь, што тя чемоданнянц кувалма. Отельса  покодись мярьгсь кинди-кинди эздост валгомс васенце этажу. Алиса кодак лийкстай! Аляц – мельганза!

Караваефне лама простямань валхт азсть. Сергей Николаевич нльне Алисань портретонц анась питнефтема сёрмадомс.

– Оду мзярдовок, – яфодезе кяденц Павел Петрович.

– Тинь ни тяда кяжия лангозонк, – кодавок ашезь лоткафтов художниксь, – тяфта лиссь.

– Монь чемоданнязе тожа тоннеть лаца, –  тяряфтсь идемс алянц цёрашабась и няфнесь Алисань «арбузнянц» лангс.

А стирнясь афи срхкась кяжияма. Сон кенярдсь, што чемоданняц мувсь, а мархтонза и Тига-Бигась, кельгома налхкшец.

Мрдасть Белкиттне отпускста сяка жа самолётса. Няеви, ваймасть лац, павазуфт. Но сембодонга павазуль китькскав чемоданнясь. Аньцек сонь вайгялец и кулевсь, мзярс кшнинь нармонць лийсь менельге.
«Арбузнясь» азондсь морять, акша караблянять, чайкатнень колга. И кода сонь тапарязь, а сяльде музь. Чемодаттне кулхцондсть и дивандасть. Куркснонга келептелезь ба, кда азорсна афолезь сёлга панжемаса. Вдь синь эздост кивок морять вестевок ашезе няе, сяс сембе каясть сельме «арбузнять» лангс. Ськамонза тяфтама павазусь ётксост.

Но Алисань «арбузняц» содазе, што сон аф ськамонза, а тага лацонза ули – морянь содай чемодання. Тимофей Караваевонь тяфтама жа, сянгяря, равжа китькскя мархта. Пароль ба содамс сонь и мархтонза ладямс! А пади васедихть нинге? Вдь чемодаттнень мархта мезе аньцек аф уленди… Алисань «арбузняц» тяни сонцьке содасы.