Простямак, Марта!

/Мокшанский язык/

Изображение: рисунок: В. Федюнина.

Дима  стясь рана. Стенаса часттне няфтсть аньцек сисем. Кодама тяса удома! Тячи синь алянц мархта тиихть од Дозорти кудня. Вага ба улель шиса Димань тона пинец… Афкуксонь кудонь ваны и цебярь ялга. Но сон тя тундать кадозе цёранять и тусь пичефксу васту, коза тушендыхть сембе кулофне.

«А пади тоса синь ёфси аф ризнайхть, – сидеста арьсекшнесь Дима, мязярда лятфнезе Дозоронц, – эряйхть-ладяйхть фкя фкянь мархта и лямонь пакарняда порендихть». Дозорсь тожа синь кельгозень.

– А тон мест тяфта рана комотеть? – кизефтезе тядяц, мзярда щаф-каряф шабась озась ярхцссемань шрать ваксс.

– Тячи алязень мархта куд Дозорти титяма! –шнафтозь азозе Дима и шаштозе инголенза ям мархта сюконять. – Тядяй, а мон тона Дозорть тага онцтон няине, – поладозе сон сетьме вайгяльняса.

– Тят пичеде, цёраняй, – кода маштсь, сяда ляпоняста мярьгсь тядяц, – тяфтама ни пинетнень эряфонь кисна, нюрьхкяня… Ярхцак, ату ямсь кельми, та весть эждемс сави.

Дима шамдозе сюконять и аделась чаенц эса, кода кудингольняса кулевсть алянц аськолксонза. Тона ни кенерсь вятемс вазнянь садику кячкорди Борькать. Дима тяфта лемдезе ляйть тона беряконц, коза сотнекшесазь вазнятнень. Синь вдь кода шабанятнень, шобдава кудста лихтьсазь, а иляденди молихть инксост. Ськамост аф мярьгихть якамда – ёмлат нинге, тапаряйхть кить лангса. Вазнятне, иттнень лаца, шиньберьф то ярхцссихть, то утцихть, то колендихть – вов и сембе тевсна.

Диманди 12 киза, но сон, ялганзон коряс, лама мезе машты алянь кудонь тевса. «Кудазор касы!» – корхтайхть колганза шабратне, мзярда няйсазь, кода цёрокшсь мезе-бди пилай, инзеди или калтыи молаткаса. Тянь семботи Дима тонадсь, алянц лангс ваномок. Ёмластакиге най шорясь вакссонза. Оцю азорсь ёмлати – сембе вастса кепотькс. Меки самста ляй трваста, аляц кенерсь тиемс кувака шобдавань кругоня, а ласькондемда меле валондомс баняса кельме ведьса. Сон тяфта най тиендии эрь кизонь шобдава. Сяс и афи сяряди. Дима вестевок ашезе няе алянц пси конят васта лангса и штоба тядяц каннель теенза медь мархта чай.

Алянц Диманди ламос учемс ашезь сав – сон и ярхцайге стане жа курокста, кода и покоди. Кафцьке пасибазь тядять, шназь пидефонц и тусть ташта гаражу. Машинать путнесазь тяни одти, а тянь эса  тисть эстеест алянь уженя. Мезе тяса аньцек аш! Эрь кодама пилат, молаткат, инзедемат, эскт, яса машинань петема инструметт. И себе синь ащихть эсь вастовас,  сяс гаражсна най урядаф, кияксоцка тяйф.
Димань аляц нинге исяк пилорамаста усксь аф кувака досканят. Вагот синь, аньцек  пилафкат, виденят. Танцти вирень шиненя яфоди эздост. Ащихть фкя фкянь лангса и учихть, мзярда нолдасазь тевс.

Тячи ёткши, алянц ваймама шиц, а Димань нинге молихть каникуланза. Урокненди анокламс аф эряви, сяс алятненди эряскодомс аш ков.

Пинень куднять шумордазь обедти. Стенанзон, кияксонц и кудобрянц тиезь гаражса, а сонцень кочказь перяфть ваксса, коса арьсесть теенза уженя. Эхи цебярня лиссь!  Дима сонцьке суваль ба потмозонза, кда тяльголь. Кели и сери – оцю пинетненди, Дозорть лаца, врас тяфтапне ладяйхть! Дима ласькфтсь кудста ташта вельхтямань пакш и ацазе кияксть лангс. Якшамста сяда лямбоня кармай.

– Аляй, а пади тячикиге Дозорть инкса ошу кфчяделеме? Мезенди вандыти учсемс? Куднясь ни анок, – мярьгсь алянцты цёрокшсь и ёжуста чипордазе сельмонц.
– Учт ни, цёрай, та фкя шиня, – отвечась аляц, – тячи монь нинге тевне. Гена щеняцень тага «атяняц» сярятькстсь. Надияфтонь лездомс.

«Атянясь» – тя Гена щенянц ташта «Беларусь» тракторняц. Най сон яжави, мзярда аф эряви. Вов и пчкафнесазь кафонест, Димань алянц мархта. Курок ушеды паксянь урядамась, сяс и аф эсь вастсонза щенянц седиец. Сярядить  мархта тев аф лиси – хуш ломанть, хуш тракторть. Мезевок аф тият, учема. Да и пиненкса вдь тердезь синь аф тячи, а ванды.

Азорфтома пинень кудсь васьфтезе Димань алянц мархта кайги увамаса. Кодамот аньцек ашесть маряв! Оцю пинетне увасть алгань вайгяльса: «Грох-грох!». Ёмлатне – вярдень: «Тяф-тяф!» А пакшкятне ёфси вяшкозь вяшксь. Дима пилензонга сёлгозень, пельсь пярявгодомс.

Ста и ащесь пяле час пантф пилет, мзярс учсезе алянц. А вов и сон! Моли эрязста и вяти мельганза шуваронь тюсса аф сери, осал, лапнай пиле пине. Аляц маладсь Димань ваксс и ёрась мзолдомс. Но мзолфоц лись кодама-бди аф весяла, мувору.

–  Тяса вов кодама тевсь, цёрай, – ушедсь кочксема валхт алясь. – Дозорть, конань надияфтозь тееньк, максозь лиятненди. А вастозонза … вов тя Мартать.

– Кода ся стане максозь лиятненди? – сельмоведьбачк ювадсь цёранясь и ёрдась кяжи сельмованф камбаряф пона пинеть лангс.

Мартась бта шарьхкодсь, што корхтамась колганза. Нолдазе прянц кияксти, потась и нежедсь кельме стенати.

– А мон тяфта учень  Дозорть эса! – тяни ашезь аварде, а пцтай урокодсь цёранясь и кафта кядьса нарнесь сельмоветть. – Сон монь мялезон нинге снимкаса тусь. Аф эряви кодамовок Марта! Куднять аф теенза тиеськ!

– Панде, панде авардемс! – мярьгсь алясь и ашкодозе цёранц. – Ватт, тявок аф кальдяв. Арьсят, авакатнень ёткса цебярь кудонь ванфтыхть аф улендихть? Эльбятькшнят! – Тоса поладозе:

– Эрь, туме, няфтьсаськ Мартати од эряма вастонц и куднянц,– и ускозе эсь пяленза пикскять.

Но пинесь афи тарсь. Сон пезфтазень нилексне пильгонзон фкя вастти и сельмонзон алга ванць цёранять лангс. Пине, а кяжиясь, бта ломань. Мартать ашель кодамовок мялец молемс мархтост. Шарьхкодезе, ашесть кенярде теенза од азорхне, и васенцекс, ёмланясь.

Диманди арась визькс, мес сон ашезень кирде сельмоведензон,  мес кяжензон пяярдезень пинеть лангс. Сон вдь аф мувору тя тевса…

– Простямак, Марта, –  сетьмоняста мярьгсь шабась. – Кальдявста тиень. Пади и тонга цебярят пиненясь, но мон онцтонга ни ладянь и колендень Дозорть мархта, – и сельмоветтне тага ожнакс пяярсть цёранять сельмоста.

 И ляпоняста корхнезь, и сюдерязь пряти алят-цёрат кяжияф пинеть. Обжафсь кодавок максозе прянц лихтемс азорфтома пинень кудста. Озафтозь машинати, фталце вастти. Дима ардсь вакссонза. Мартась ки лангса прянц вятезе сетьмоста.

Кирдемска ашезь сав, штоба афоль комотне. Коза усксазь? Мезенди усксазь? «Кяжи лангозон нинге», – арьсесь Дима и эсь потмованза сюцезе прянц.

Тядяц учсь эсост перяфть инголе. Кодак марязе машина «вайгяльть», станяк и лиссь васьфтемост – ингольксонцка ашезе валхта, кядьсонза нардама.

– А монь обедозе ни анок! Теентть и Дозорти, – весяласта азозе авась.

– Аф Дозорти, а Мартати, – корязонза ёфси аф весяласта мярьгсь Дима и лихтезе машинаста пинеть.

– Вот тя сюрприз! – дивандазевсь тядясь и лашадезень кядензон. – А тон, цёраняй, ванан, тянкса пичефксти прать… Аш месть ризнамс. – А тоса, ваномок пинеть пильгста пряс, поладозе:

– Кодама цебярня и ёню! Сельмонзон коряс шарьхкодине.

– Монга тянь колга! – кирдезе рьванц алясь. – Тонады, ванцасть, сондедонза цебярь пине аф муят!

– Ну пара! Вятесть Мартать од «квартиразонза», а мон ярхцамс теенза кандан, – ляпоста мярьгсь Димань тядяц и сувась куду.

Шабась вятезе пинеть од куднять ваксс и валхтозе кргастонза пикскять.

– Тя куднять алязень мархта минь тиеськ… минь тиеськ…

Цёранясь мярьгокшесь «Дозорти», но варжакстсь шуваронь тюсса осалня пиненять сельмос и лоткась. Эсост сон няйсь … сельмоветть! Мартась авардсь кода пичефксу, ризнай ломань. Дима арась плманжа лангс,  ашкодозе пиненц и мярьгсь:

–  Тейть, Марта!