Молитва иеросх. Парфения Киевского к Богородице

Возлюбленная Богу Отцу Дщерь, безмужная Еммануила Мати, кристалловидная Утешителя Невесто, и всякия святыни вместилище! Радоватися Тебе о Господе!

О Святоглаголивая Горлице, высшая небес Владычице и чистшая светлостей солнечных, белолиленный Творца ковчеже, молниелучный Христа сосуде, орошенная Духом Росоносным и от Ангела манною воспитанная, благодать свыше паче всех получившая, и всех тварей превосходящая! Дражайшая моя Покровительнице! Умилосердися надо мной жалким! Недомыслимаго Слова престоле и Неизследимаго Жениха чертоже; благородное гнездо Орла Небеснаго и зерцало Христовых Тайн; красото безплотным Ангелом и похвало угодником Божиим! Желанная моя Защитнице и Попечительнице! Не отрини просьбы в крайней нужде моей! Нетленная Родительнице Владычня, и браку непричастная, и неискусомужная Царице; несгораемая свеще мирови и слепотствующим светящая! Всепетая Мати, Утешительнице и Спасительнице! Спаси мене от лукаваго в пагубней сей суете!

Архангельский Гавриилов глас вопию Ти, Троицею увенчанная, Пронареченная Отроковице, между Богом и людьми посреднице обретшаяся: Царюющая, о радуйся! С Тобою Господь! Торжествуй, быти Матерь Владыки Мессии сподобльшаяся!

Общий Ангел хранитель наш, Дево, и в призывании скоропослушливая. Полезному моему прошению помочь можешь; поручница мне в житии исправительница буди!

Не хочу от Тебе более ничего, ниже дневнаго пропитания; единого же только желаю: дай ми возлюбити всем сердцем Сына Твоего, Господа и Бога нашего Иисуса Христа, и Твоим Матерним ходатайством получить наследие жизни вечныя, честною Кровию Его нам стяжанныя. Аминь.