Алашаня

/Мокшанский язык/

Изображение: источник - интернет.

Эрь кодама илатнень ёткста Денискась сембода кельгсы Од кизоть. Нльне эсь шачема шинцка аф стане учсы, кода кузнянь наряжама пингть. Сембе кемгафтува кофнень цёранясь прянц вятьсы лац, школаста аньцек «ветет» канни, вастонц стямста ацсесы, щаванцты лезды. Сяс Якшам Атясь цебярь казнетка теенза най тушенды. Но тевсь аф сяшкава казнеса ащи, кода сонцень Од кизоть учеманц эса.

Ломаттне тяряфтыхть сяда мазыняста наряжамс кудботмоснон. Срхкафтыхть кузнят, петфнихть вальмаснонды ловонь тяштенят, ласькондихть магазинга, вешендихть, мезе радняснонды каземс. Оцюфненди вдь Якшам Атясь казнет аф канни!

А кода полафты ошсь! Бта аф ульцява молят, а ёфкснонь кива. Шуфттне и столбатне палы толнянь кярьксса ашкоряфт. Ловсь алост цифтор-цифтор моли, щятямска лангозонза ужяль. Оцю лавкатнень куцема пряса фаф ловонь бабат ломатнень эса васьфнихть. Люкайхть кафта пяли вармать ала, яфиихть пряснон мархта  – тяфта сувамс и мезевок рамамс тердихть. Вальмя клянцнень лангса рисаваф Ловонь стирнят,  келасть, нумолнят мзолдыхть.

Ошть кучкас нльне кшнинь сярда нурда мархта стяфтыхть! Сярдть фкя ингольце пильгоц мяньф – аньцек сяконь и учи, мзярда сай весь и сембе ломаттне мадондыхть. А сон дёрнофтсы нурдонц и туй арнема ульцятнень шанчк. Сонга, шять, сизи фкя вастса нюрьксемс шиньберьф.

– Тяфтама чуда нинге ашень няенди! – мярьгсь Денискать щавац, мзярда шоподемшовор синь маладсть светяй сярдть ваксс. – И сюронзовок палыхть!

Бабась аф кунара ётась эряма идензон пяли ошу и аф лоткси дивандакшнемс тястонь чудатнень лангс. Велеса вдь тяфтама кшнинь сяртт сон ашезь няенде.
Мзярда «чудась» ванфоль пильгста пряс, Денискась пшкядсь щаванцты:

– Аре, щаваняй, суватама магазину и кузняньконди од налхкш раматама.

Лавкань лапаня ланкне пяшксетольхть эрь кодама тюсса пиндолды шарда, пяштеняда, пангоняда. Да сняра ульсь эздост! Ванондомс сембонь марнек шиське афоль сата.

– Ватта, Дениска, карунь пангтьке тяза путозь! – рахазевсь бабась. – Мазыемс мазы, но деряй сон Од кизонь налхкшнень ёткс ладяй?  Тянь аф вастоц  аф кептерняса, аф кузнять лангса!

– А тянь? – пеедезь кизефтезе уноксь и сявсь кядезонза оцю марьшка якстерь ксты.

– Тяшкать сивсак, фкятивок топодят, – тевонь содайкс мярьгсь щавась и шукадезе прянц: – Тявок аф кондясти. Разе касыхть вирьса тяфтама имошт? Налхкшень тиихне вестевок синць ксыс, пажалы, ашесть яка.

Тяньге путозь меки вастозонза.

– Вов тонь и вешендихтень! – кенярдезь азозе Денискась и таргась кагодонь паргоняста аф оцю алашаня. Сонць прянек-пильгонек коричневай, а конясонза – акша тяштеня. Равжа паргана гривац и пулоц сиянь почфса почертфт.

Но цёранять мзолфоц кодане эвондась, стане и юмась. Алашанясь фкя пильгфтемоль – магазину ускомста, пади синдевсь. А лия тяфтама, лацонза ашель. Ужяль… Од кизонь кузнять лангс тапаф налхкшт вдь аф повфнихть.

Денискать щавац ёрась кодавок петемс уноконц мяленц и кармась няфнема лия мазы налхкшнень лангс:

– Сявк вастозонза вов тя келаськять. Эк, кода пееди! Балалайка мадясонза кирди, морама аноклась. Сеельняське пара. Кептерняц марьда пяшкодезе, инжикс срхкась.

– Аф, аф! Кодамовок аф эряви! – афи варжакстсь весяла налхкшнень лангс Денискась и тусь кенкшнень шири. – Конацка аф мялезон.

Щавац мельганза. Сявозе кядьта и кизефтезе:

– А мес, шта, аф мялезот?

– Тя налхкшне налхкшекс и няевихть. А алашанясь бта афкуксонь, аньцек ёмланя. Понац тяфтама жа ляпоня, кода и видексоннеть.

Куду молемста Денискась фкявок валне ашезь прафта, мольсь комафтф прят и мезень-бди колга арьсесь. Аньцек подъездть ваксса кизефтезе щаванц: мезьса сон кузнять наряжакшнезе, мзярда лацонза ёмланяль? Вдь эста тяфтама мазы налхкшт ашельхть, нльне кодамотка ашельхть!

Лоткасть щават-унокт фонарть палы сельмонц алу и кармасть корхнема. Ушесь пароль, лямболь. Мольсь сетьме ловня. Куду сувамацевок аф сай. Станяк и ащелеть ба и ванондолеть, кода лиендихть ловонь тяштенятне и акшептсазь перьфпяльть.

– Арьсят, минь кузяньке апак наряжак ащекшнесть? – мярьгсь щавац. – Минь минць налхкшт тиедеме!

– А мезьста, щавай?

– Тядяньконь паргоняса панаронь и ингольксонь стамда меле наголь иляткшесть эрь кодама лоскоткат, пиндолды сюренят, лента пенят – вов синь и ноляськ тевс, – кармась азондома бабась.

– И мезе эздост лисендсь?

– Няканят, атёкшкат, нумолнят. И нинге кодама цебярьнят!

– А алашанят тиендеде? – кизефтезе Денискась.

Щавац аньцек тяни шарьхкодезе, кона пяли уски ёжу уноконяц. Пеедезевсь и пшкядсь:

– А кода ина? Тят пичеде! И тейтьке титяма!

Омбоце шиня Денискась рисавась эчке кагодть лангс алашаня, керозе васоньбеельса и няфтезе щаванцты:

– Щавай, тяфтамсь пара ули?

Бабась шназе тифонц, таргась арзянястонза кячказ, сюрет- крьнят и мярьгсь:

– А тяни минь алашанять эреклафтсаськ.

И ушедсь кагодонь налхкшкять ланга кячказса кодама, коричневай сюрень сюлмонят сей-тов яфиема. Вов алашать «понашкодсть» пильгонза, тоса пекоц, копорец, пряц и мекольцекс пиленза. А равжа пиндолды сюре пенятнень эзда грива и пула тись. Кувакат и валазят – бта сюрьхцемса сеендезь.

Денискась вешсь щаванц мазыптомканзон ёткста кафта сенем цифторды ожнанят, и бабась стазень синь алашаняти. Тяни сельмонзовок улихть!

Щавась шарфнезе-тиезе кядьсонза налхкшть и азозе:

– Мезе-бди, уноконяй, аф саты…

– Конязонза акша тяштеня! – талакодсь Денискась.

Тяштенять мархта алашанясь та сядонга мазыня арась. Пинге тарксема ашесть карма и кафонест эрязста срхкафтозь Од кизонь кузнять. Повфтасть гирляндат, пиндолды шархт, мазы кагодса ашкотф конфетат. А алашанять сембода няеви вастти ладязь. Нюрьги и люкай, мярьгат эсь киванза ков-бди ласьки.

Ванць щавась лангозонза, кельксезе сембе ширде и мярьгсь:

– Врас щятяцень Манюняц! Мяляфтсак, кода алашаса арфнензе?

Денискать щавац озась ватсонц лангс и ушедсь лятфнема:

– Сай стадань ванома вастста ластя, а тон каршезонза ласькат, кядьнятнень венептьсайть. Мон кеподте, щятяце озафттанза инголенза. Кецят! И вдь ашеть пеле!

Но цёранясь аф Манюнять, аф алашать азоронц ашезе мяляфта. Колма кизонятольхть теенза, мзярда щятяц тусь эряфста. Денискась озась бабать ваксс и кельгозь ашкодозе кргада.

Улель шиса щятяц – сонга кенярдель щаванц лаца, няемок Манюнять Од кизонь кузнять лангса.