Ниле строчкат

/Мокшанский язык/

Изображение: рисунок Е. Колмаковой.

Аньцек ниле строчкат,
Алост – якстерь седи.
Тага тя открытканясь
Мялезон монь ляди.

Фкясь стирнятнень эзда
Шачем шизон тяштезе.
Афоль няев киндивок –
Книгазон сонь кяшезе.

Сёрматфть коряс курокста
Казиенц мон содайне.
Няелесте лангсонза
Эста рахань кодане!

А сон, сетяв мелавнясь,
Валнявок изь прафта.
Мезенди сонь обжайне?
Мезенди мон тяфта?

Эста, азса видеста,
Панцень лиянь мельге.
Хуш стирнясь ся, содаса,
Прокс ашемань кельге.

Туста шярь, мазыня,
Ронгоц сонь шуваняня.
Морсекшнель ансамбльса,
Юбканяц нюрьхкяняня.

Арьсень аньцек колганза,
Ветьке афи удолень.
Тяштель валня – павазукс
Сембода мон улелень…

Нолдамазь каникулас –
Юкснемонза ушедонь.
А вов обжаф мелавнясь
Мяльстон ашезь тушенда.

Сёксесь тага кочкамазь
Школав, парта ваксс.
Кода-бди сюнерьгодсь,
Арась клазсь лиякс…

Роди тякот ялгане
И уроконь вятихне.
Ваныхть виде стенаста
Сакалу писательхне.

Сльде прязон путыне,
Тейне мезсь аф стане.
Ашель озамвастсонза
Сетяв мелавсь – Таня.

Азозсь, ошу эряма
Кизонда сон тусь.
А монь седи потмосон
Пичефкссь васта мусь.

Эстокиге лятфтайне
Лентанц пула песа,
Пзьгоналу шалхконянц,
Толнять ванфонц эса.

Кода стихонь лувомста
Поволь «р»-ти кялец,
Кода рахазь обжайне –
Колайне сонь мяленц.

Аньцек ниле строчкат,
Алост – якстерь седи.
Тага тя открытканясь
Мялезон монь ляди.