Йахь йоцчу кIентан сибат

ЙАХЬ ЙОЦЧУ КIЕНТАН СИБАТ


Йахь йоцчу кIентан «йахь» – хьагI...
Цуьнан Iер-вахар – хЕне валар...
Цуьнан собар – дистина Орга...
Цуьнан гIайгIа – цкъа вала везар...
Цуьнан чIагIо – цацан чохь гIум...
Цуьнан къайле – ма-варра гучуцавалар...
Цуьнан иэс – ша-шеха долчу дозаллин гIаларт...
Цунна дезарг – дегIанна, урх хецна, маршо...
Цунна моьттург – шан тIехь йина гIала...
Цуьнан ийман – тIедуьйхина барзакъ...
Цуьнан ойла – мухха а, даьхне...
Цуьнан амал – доцург тардара...
Ткъа барам – «Кхин тIе а, оццул!»...
Цуьнан велар – кийрара жиргIа...
Велхара – бIаьрхийна татол...
Цуьнан шовда – Iам лаьттинчохь уьшал...
Ткъа Iилма – дуьйцург, шен луъачу агIор, карчор...
Цуьнан йуьхь  –  бIаьрзе лаамаш...
Ткъа оьмар – хедийна орамаш...
Цуьнан ницкъ – гIийланиг иэшор...
Ткъа толам – бIостанехьа буолам...
Цуьнан орца – кхана хьо урамехь вийцар...
Цуьнан дика – йухалурган делларг...
Цуьнан вуо – хьан дагчуьра вуожар...
Цуьнан лазар – доза доцу хабарш дийцар...
Цуьнан хьекъал – бозбуамчалла...
Цуьнан хьуьнар – шен цхьанне оьшург лахар...
Цуьнан дийцар – «ас», «со»...
Цуьнан гIиллакх – гайтам...
Цуьнан оьздангалла – моттаргIа...
Цуьнан къинхетам – гIуорийна кхача...
Цуьнан совгIат – стиглара тача...
Цуьнан некъ – тIехиъъина ворда...
Цуьнан дозалла – сирбелла корта...
Цуьнан дош – цкъа мацца а, шалхе...
Цуо буьйцу мотт – кегийна хатт...
Цунна Даймохк безар – иза магар...
Цуьнан цIий – пхенашчуьра тIунал...
Цуьнан безам – хIинцца марзъелларг...
Цуьнан чIир-бекхам – йамартло...
Цуьнан дуьненахьежам – ша-шена тардина гIенаш...
Цуьнан хьехар – шайтIана мох...
Цуьнан кхечунга ладогIар – иза аьлла ваьлча, йуха а шенаг дийцар...
Цуьнан къонахчалла – доцург...
Цуьнан нохчалла – кор-неI йоцу хIусам...

Маржа-йаI, дахар...
Ма декъаза ду-кха хьо,
Йахь йоцчу кIентан!

2015-чу шарахь