Аджашдыкъ

Бизни бютеу байлыгъыбыз - заманды,
Джанны тутхан - бир тартылгъан солууду,
Муну эсге алмауубуз - аманды,
Джаратханны джашау хатын бузууду.

Ёлмей джашаб турлукълача джашайбыз,
Бош затлагъа, керексизге сый бериб,
Башхалагъа тюртлю кёз бла къарайбыз,
Уллу кёллю, сёз джетдире, кёл кериб.

Махдаулугъа махдау салыу къалгъанды,
Сёгюу - адет болуб къалды миллетге,
Хар шагъатлыкъ, хар тёре сёз - джалгъанды,
Терс къарала тюзге, таза иннетге.

Базар тини акъыллагъа синнгенди,
Ушагъыбыз - мал барлыкъ бла, кириден,
Алыу-бериу дараджагъа миннгенди,
Айтылмайды акъылмандан, алимден.

Батыуулда болгъаныбыз - ачыкъда,
Алай аны эслемейбиз, кёрмейбиз,
Тёнгек токъду, алай рухла - ачлыкъда,
Ол а халкъны талкъ этерин билмейбиз.

Иги сёзге къызгъанч болдукъ, айтмайбыз,
Джапсарыу тюл, табалауду ишибиз,
Акъыл бёлюб джангылычдан къайтмайбыз,
Кемириуден къамамайын тишибиз.

Бир солууду джаныбызны джашатхан,
Кесек заман - ёмюр деген чагъыбыз,
Неди бизни ма быллай бир алджатхан,
Тюзелмезден чынгкъылырча ангыбыз?

Бизни бютеу байлыгъыбыз заманды,
Малыбыз да, мюлкюбюз да - солууду!
Муну эсде таймай тутхан - Адамды,
Тутмагъанлыкъ - адамлыкъдан чыгъыуду!