Кимден излейик джакълыкъ?

ХААРП хауаны баса,
Джау кюннге булут  аса,
Болум джашауну къыса…
Кимден излейик джакълыкъ!

«Эмина» келиб, уруб,
Джаназы сафла къуруб,
Барады халкъны джутуб…
Кимден излейик джакълыкъ!

Ауруу джайгъанла – азат,
Этген ишлери – фесат,
Алай алмайла  азаб…
Кимден излейик джакълыкъ!

Шат болгъан бары – аман,
Гылгъа намысын  сатхан,
Иблис  джолунда баргъан…
Кимден излейик джакълыкъ!

Даулет халкъындан – ирек,
Башчылыкъ этген бёлек
Болмады таянч, билек…
Кимден излейик джакълыкъ!

Джан  ачыу – къартда, джашда,
Ёзсюзлюк – сууда, ашда,
Мыдахлыкъ – кёзде, къашда…
Кимден излейик джакълыкъ!

Джаула кюн джарыкъ тыя,
Кёкден уу джауум къуя,
Джерге  ауруула  джая…
Кимден излейик джакълыкъ!

Алдау бла зорлукъ – къошду,
Кертини излеу – бошду,
Миллет арсарды, шошду…
Кимден излейик джакълыкъ!

Терс тёре терслик эте,
Кертиге заран джете,
Адамлыкъ Джерден  кете…
Кимден излейик джакълыкъ!

Эресей къашын кермей,
Хар кюню тынгы бермей,
Барады джолун кёрмей…
Кимден излейик джакълыкъ!
14.01.2022.