Сынау заман

Дуния – тайгъакъ, аякъ тутмазлай,
Джазыу джыгъылды, болду турмазлай,
Кече басханды, акъ танг атмазлай,
Джашау батханды, алгъа  тартмазлай.


Дуния бийлик – къарангы джая,
Адам джан бла джасагъын джыя,
Ким келе – келир аланы тыя,
Адам улуна джангы джол къыя!?..


Сагъышла сауут кибик кеселле,
Аман хапарла эсге келелле,
Ибилисчиле оноу этелле,
Зулму буйрукъла халкъгъа джетелле.


Акъыл тургъанды, арсарлыкъ басыб,
Алгъынча оюм эталмай, къатыб,
Къобхан къобанча, къара кюч тартыб,
Кетиб барабыз тунчугъуб, батыб.


Джюрек тебеди дертни кёбейте,
Акъыл тыяды, халны эскерте,
Адамлыкъ, тюзлюк джашаудан кете,
Болуб барабыз бир ырнык чете*.


Джаратхан бизге сынау бергенди,
Эки джол ызны Джерге чертгенди,
«Кесинг сайла» - деб буйрукъ этгенди,
Бизге да сайлар заман джетгенди.


Зулмучулагъа тыйгъыч салмасакъ,
Аланы тархдан сюйреб алмасакъ,
Бу джол джол тюлдю, тюзге тартмасакъ,
Нюр джайгъан джол бла Хакъгъа бармасакъ.


Дуния – тайгъакъ, аякъ тутмайды,
Джазыу джатханды, ёрге къобмайды,
Джашау тыннганды, алгъа  тартмайды,
Кече басханды, акъ танг атмайды.


17.01.2022.
---------------
*Чете-банда.