Заманыбыз

Салпыланыб сюеледи,
Джазыкъсыныр кёрюнеди,
Чапыракъсыз алма терек,
Тёббесинде къаргъа бёлек,
Джоббулашыб олтурады,
Джел да ишин бардырады,
Бутакъларын титирете,
Къач келгенин айгъакъ эте.


Къыш узакъда болмагъанын,
Суукъ джолда къалмагъанын,
Тау аязы билдиргенди,
Минги тау да эндиргенди,
Къар булутну имбашына,
Къобан суу да, тюб ташына
Къаратырлай, сайыкъгъанды,
Чегет шошуб, буюкъгъанды.


Минги Кавказ джылыусузду,
Джашауундан умутсузду:
Бир джанындан ауруу уруб,
Бир джанындан даулет бууб,
Хар атламгъа чек салыныб,
Алай бла онг алыныб,
Тыйылгъанды тамам таргъа,
Тюшген кибик терен джаргъа.


Ишсиз – кючсюз, инджилиуде,
Эски чакъгъа термилиуде,
Тыш бийлени бийлигинде,
Джесир болгъан даулетинде,
Эресейни халкъы – мугур,
Келир кюню – къара чунгур,
Джек умметден къутулмаса,
Джангы къырал къурулмаса.


Къыш кюнлери джуукълаша,
Умут, мурат узакълаша,
Салах таууш – таймаз болду,
Аман хапар джуртха толду…
Симсирейбиз, ачыу чайнай,
Акъыллада соруу къайнай:
«Къалай болдукъ джаугъа джесир,
Тёлер кибик быллай тазир?..»


Къаргъа басхан алма терек,
Къачхы джелге бой беререк,
Эресейни эсгертеди,
Ауур сагъыш этдиреди,
Халкъгъа къаршчы джыйын – башда,
Уу хауада, сёзде, ашда…
Ахырзаман келди – дерлей,
Миллет – мискин, «оу» этерлей.

2021