Эскериу

Ашланыучу джара кибик джангыра,
Кёчкюнчюлюк джаралары бителмей,
Ёмюр барад эсгере да, ахсына,
Ол артыкълыкъ акъылладан кетелмей.
 
Ким унутур Къарачайны ол кюнюн,
Ким унутур худжу къалгъан эллени,
Ким унутур,  юйюн, малын, кирисин
Тоноу этген, инсан бетли, итлени.

Ким унутсун, вагонлагъа  джюклениб,
Халкъыбызны джылау эте кетгенин,
Онтёрт джылны къум тюзледе тюгениб,
Баш мадарсыз, джан дыгалас этгенин?

Азияда шеит болуб ёлгенле,
Сары къумгъа сансыз - сансыз кёмюлюб,
Къыйынлыкъда бушуу басхан джюрекле,
Деулетинден, тюзлюкден да тюнгюлюб.

Хатхум къысыб, болуучанма кёл азар,
«Туугъан джерим Казахстанды» - дегенлей,
Тёлюледен къуанч эте ким джашар,
Халкъыбызны ол джазыуун билгенлей.

Джарымыбыз къайтды артха, таулагъа,
Малсыз, мюлксюз, бир Аллахха базына,
Кёблерибиз кёз джумдула дуниягъа,
Ахыр сёзде ата джуртну сагъына.

Джуртубузну нюр шахары, Къарачай,
Джан - джанындан тауларыбыз къадалыб,
Джау къолунда турмадымы, абзырай,
Атына да «Клухори» деб аталыб?

Къарачайым, джарлы халкъым, атыла,
Кёбге тёздюнг, назик джанынг тюйюлюб,
Къабырларынг Азияда къалдыла,
Юслерине къан джыламукъ тёгюлюб.

Минги тауум, ташлы къолум, ёзеним,
Къыс халкъынгы баурунга, тиймезлей,
Ким биледи, энтда «ырхы», «суу» келиб,
Ата джуртдан уруб алыб кетмезлей.

Хунн, Аланны къан юзюгю халкъынга,
Бир заман да джакълыгъынгы ташлама,
Ата - баба къоруй келген джуртума,
Ачкёзлени, заркёзлени бошлама.

Унутмайыкъ зулму чакъгъан джылланы, 
Иблис уммет азау джаргъан заманны,      
Бир - бирине киритлейик къолланы,
Биригиу бла хорлар ючюн аманны.