Кёл сууумаса, боран урса да,
Мурат терекни тамыры тутар,
Ол терекге да, къачан болса да,
Санга джыр айтыр бир чыпчыкъ къонар.
Не кёб болса да ачытхан затынг,
Тийишме сени юзген адамгъа,
Дерт джетдирирге болмасын антынг,
Кирме аны бла тенглик базманнга.
Хар этгенибиз - чёмелтаякъды,
Къайтыб урлукъду, эсленмей тюшюб,
Терслик этген да абзырарыкъды,
Этген затларын ауур тюшюнюб.
Ачытхан - ачыр, ургъан - урулур,
Хар ким этгенин чекмейин кетмез,
Аламны чархы алай бурулур -
Зулмугъа тиймей джанындан ётмез.
Джукълатма, тенгим, умут джилтинни,
Ол джюрегинге джылыуун атар,
Джылы джюрек а, кесича бирни,
Къайдан болса да кесине тартар.
Кёл сууумаса, боран урса да,
Мурат терекни тамыры тутар,
Ол терекге да, къачан болса да
Санга джыр айтыр бир чыпчыкъ къонар.
2019.
Тенгим Элинагъа
© Copyright: Софи Трам-Семен 2, 2022
Свидетельство о публикации №222011801153
Свидетельство о публикации №222011801153
Рецензии