Аслан урулду да
Тёр джеклеге къалды,
Булбул буулду да
Кёкню къаргъа алды.
Асылсыз шорбатла
Джек тинни алдыла,
Аслан тин тутханла
Таргъа тыйылдыла.
Лобанла къазалла
Даулетими тюбюн,
Чакъанла басалла
Джуртну тауун, тюзюн.
Халкъ мыдахланнганды
Кёлтюрюлмей башы,
Кёлю булгъаннганды
Сингдирилмей ашы.
Джуртуму байлыгъын
Маджала къабалла,
Сабанын, джайлыгъын
Сатлыкъла саталла.
Булут джайылгъанды
Ачылмайды кёгюм,
Джашау тыйылгъанды
Джарымайды кёзюм.
Ай, медет, алдандыкъ
Джекни тёрге тартыб,
«Къарагъа» алландыкъ
«Акъны» артха атыб!..
Аслан урулду да –
Тёр джекледен толду…
Булбул буулду да –
Къаргъа джырчы болду.
2021.
Ачыуум
© Copyright: Софи Трам-Семен 2, 2022
Свидетельство о публикации №222011800034
Свидетельство о публикации №222011800034
Рецензии