Эшиу ийнеле, анамдан къалыб,
Манга джетдиле, мыдахлыкъ салыб,
Ала - къолумда, эшиу эшеме,
Озгъан джыллагъа сагъыш этеме.
Ала анама ыннадан келиб,
Аны къолунда бир ёмюр кёрюб,
Манга джетдиле, тюрленмегенлей,
Ийелерин да эскермегенлей.
Джансыз темирле – адамдан кючлю,
Аланы юсю болмады берчли,
Эгеб, ашалыб, азаймадыла,
Адамла кибик къартаймадыла.
Энтда ненчабыз аланы алыр,
Эшиуню эшиб, орнуна салыр,
Ненча ёмюрню къалырла ала,
Мыдах сагъышха башланы сала?
Эшиу ийнеле, анамдан къалыб,
Манга джетдиле, мыдахлыкъ салыб,
Аланы бура, эшиу эшеме,
Къысха ёмюрге сагъыш этеме.
Стамбул/Турция.
Анамы эшиу ийнелери
© Copyright: Софи Трам-Семен 2, 2022
Свидетельство о публикации №222020201454
Свидетельство о публикации №222020201454
Рецензии