Сан тарда болса анг кериледи,
Джау къаты болса рух кючленеди,
Джауум барды - деб тарыкъсанг манга,
Ол аламатды - дерикме санга.
Не ючюн десенг, сени уулау бла,
Аякъ ызынгы таймай ызлау бла,
Джау кеси джолун терсине къыяр,
Зар ёчюгюуге джашауун джояр.
Сен къулакъ салма сёзню сюргеннге,
Джангылычынгы гюнах кёргеннге,
Мийик терекге шыбыла тийер,
Тийсе да джангыз бутагъы кюйер.
Ёзю къатыгъа джау джеталмайды,
Не кир атса да джетдиралмайды,
Сёзю адамны болумун ачар,
Не - тёрге, не да багушха тартар.
Бауда ёсгенни къайгъысы - сыгын,
Ачлыкъ джетгенни тилеги - гырджын,
Джау бла демлеше заманны джойма,
Сен джюрюр джолну башхагъа къойма.
Сен, булбул кибик, джырла джырлаучу,
Ала къаргъача къутсуз къарлаучу,
Телини - махдай, парийни - сылай -
Уллу адамны джашауу - алай.
Анкара/Турция
Тарыкъгъан джырчыгъа
© Copyright: Софи Трам-Семен 2, 2022
Свидетельство о публикации №222020201473
Свидетельство о публикации №222020201473
Рецензии