Ой, бир хал бар бусагъатда дунияда!

Ибилисни ахлулары тёрге чыгъыб,
Шайтан тойну тауушлары къулакъ джырыб,
Бир джыйымдыкъ  адам улгъа   тузакъ къуруб...
Ой, бир хал бар, бусагъатда дунияда!

Башчы  къауум халкъны тонаб, онглу болуб,
Кемсиз байлыкъ  аманлада  толу болуб,
Итлик этер  адамланы  онгу болуб...
Ой, бир хал бар,  бусагъатда  дунияда!

Адам улу туз дамыны табалмайын,
Зорлукъ басыб, арсар болуб, къобалмайын,
Къутхарылыр джолгъа кесин салалмайын...
Ой, бир хал бар, бусагъатда  дунияда!

Миллет - мугур, "огъай",  дерге, болум табмай,
Къан эмиучю эмгичлени  юсден атмай,
Зорлукъ чеге тюгенсе да, акъыл къатмай...
Ой, бир хал бар, бусагъатда  дунияда!

Эки бетли керахатла бийлигинде,
Алагъа - къул  антсызланы бирлигинде,
Джашау бата чынгыл джарны теренинде...
Ой, бир хал бар,  бусагъатда  дунияда!

Джер юсюне  керахатла  ие болуб,
Хаталары хар даулетге  тиер болуб,
Хар миллетни юйю-кюню кюйер болуб...
Ой, бир хал бар,  бусагъатда  дунияда!

Халкъ ёрелеб, къадамача   сюелмесе,
Ёлюм-къалым  сермешине  кирилмесе,
Къарангыгъа  тартханлагъа  тийилмесе,
Ким биледи, не хал болур  дунияда?!