Джуртуму халы

ДЖУРТУМУ ХАЛЫ

Суу булгъанса кири башха чыгъыучанды,
Кърал къатышса аман орун алыучанды,
Булбул кетсе кёкге къаргъа чыгъыучанды,
Къау - къуу эте джыр эсебни бузуучанды.


Алай болду ата джуртум, аман къауум,
Кючледиле деу къралымы джерин, тауун,
«Малинала» джайылдыла даулетиме,
Джарашалмай аны ариу келбетине.


Джукъ айтханлай, асылсызла, аууз ачыб,
Кир иннетни, кир сёзлени кенге чачыб,
Эзеу болуб тамгъа салыу тамаллашды,
Гылчы, бетсиз, ётюрюкчю шогъайлашды.


Сейирсиндим тарбашланы кемлигине,
Къымгъычланы гыл ишледе итлигине,
Фахмусузну фахмулугъа чабханына,
Асылсызны асыл орун алгъанына.


Дертли болдум болмазланы болгъанына,
Джуртуму да чарт - гуртладан толгъанына,
Тёзер болуб кюнлей-кюнде  сындырыугъа,
Джек сафында, баш кёлтюрмей бу барыугъа.


"Сууу булгъаныб" кири кёзге чёмелгенди,
Джурт къатышыб джау "джюгенни" кючлегенди,
Джек - уммети керпеслениб джайылгъанды,
Эресей да тар джашаугъа тыйылгъанды.

2010