МЕН болмаса БИЗ да джокъду...

Дунияда хар бир джанны ашаучусу барды,
Аны ючюн джашау былай ачыулуду, тарды.

Адам башха джанлылагъа тыйгъычла салгъанды,
Алай кеси къабар хырсдан къутулмай къалгъанды.

Ашагъандан башхасы - не,  джалгъан сёлешиуню,
Табны айтыб, тюзню терслеб, хайыр тюшюрюуню?

Ашагъандан башхамыды кир иннет джюрютген,
Эзеу болуб, кючсюзлеге эзиу, басыу этген?

Ашагъандан башхасы - не, зарлыкъ къайнатыуну,
Фахмулугъа фахмусузла ачыу чайнатыуну?

"Ашау" демей не дериксе бирин сындыргъаннга,
Джалгъан сёз бла джанын къыйнаб джашауун къыргъаннга?

Ашагъандан неси башха пасыкълыкъ этгенни,
Питна бла, хыйла бла муратха джетгенни?

Халкъны "этин" къабмаймыды казнадан урлагъан,
Ара мюлкню талан этиб, миллетни зорлагъан?

"Ашау" демей не дериксе онглуну  джыгъыугъа,
Биреуленни хакъын ашаб ёргеге чыгъыугъа?

Туура этин къабмаса да бу "ашау" тюлмюдю?..
Быллай халда  тургъан халкъда адамлыкъ - кюлмюдю?..

Кимбиз? Небиз? Нек джашайбыз? - деб соралабызмы?
Быллай джашау терс болгъанын англаялабызмы?

Да джау эсек сора  бирге биз нек джыйылгъанбыз?
Бир халкъ деген ат аталыб неден айтылгъанбыз?

Джаныуарны бар болуму аны тишиндеди,
Адамны уа, адам эсе, онгнгу - тининдеди.

Тин а сезим дунияны кенглешдирген хюрдю,
Ол ананы акъ сютю бла джерлешген бир нюрдю.

Да къайдады ол тин байлыкъ, къайда тас этгенбиз?
Джау джыйынча  джашар халгъа былай нек джетгенбиз?

Дунияда бола тургъан - тинсизликден болду,
Бусагъатда биз тутхан да аллай къыйсыкъ джолду.

Алайды да, "ойлашыу"- деб заман шахланнганды,
Не - бар болуу, не - джокъ болуу кёзге къарагъанды.

Да, келигиз, хайыр иш бла джюрек джабсарайыкъ,
Кете баргъан  адамлыкъны артха къайтарайыкъ!

"МЕН" болмаса "БИЗ" да джокъду, тюшюндюрсюн бу!
"БИЗ" болмаса "МЕН" да джокъду, бирлешдирсин бу!