Муратым

Муратым барады кёкледе, керилиб,
Тёнгегим турады тарлыкъда, тирелиб,
Узалама десем къолум джеталмайды,
Мени тутхан "тар" да санны бошламайды.

Мийикге къарай эм, алашаны сюймей,
Уллу мурат этдим, джашау шартны билмей,
Оюм бла онгум бири бирин тутмай,
Кёб абыныр болдум барыр таб джол табмай.

Аджаша, джангыла, джангыдан тиреле,
Муратны ызладым умутха териле,
Тар сокъмакъда бардым, таш джолну да ётдюм,
Къуанчым аз болду, бушууну кёб чекдим.

Хар кюнюм байлады, насыб джалгъан болду,
Ышаныучу джюрек джараладан толду,
Хакъым кёб ашалды, къыйыным кёб кетди,
Мен бек сюйгенледен ачы заран джетди.

Энди къыт къадарым къысха шогъай болду,
"Да, джашау алай"- деб кеси башын джулду,
"Меничала кёбдю" - дей кеси-кесиме,
Тюшюрмей турама насыбны эсиме.

Мурат а барады кёкледе, керилиб,
Тёнгегим турады тарлыкъда, тирелиб,
Узалама десем къолум джеталмазды,
Мени тутхан "тар" да энди бошламазды.

2019.