Шохха

Къарангыдан къарангыгъа биз барабыз тизилгенлей,
"Ёмюр" деген ташлы джолда джан да, сан да эзилгенлей,
Къарангыдан бир кесекге баш къаратыб Кюн джарыкъгъа,
Анга "джашау" дейбиз, бара, тоюнмаучу  джер джырыкъгъа.

Айтчы, шохум, бу джашауну магъанасын, биле эсенг,
Бу хар кюнлюк  сан тюйюуде  бир магъана кёре эсенг,
Тоханада олтургъанла, ёлюм тиймез, ёргемилле,
Орамлада джашагъанла Джаратханнга ёгемилле?

Кёз къакъгъанча бир ёмюрде нек болгъанбыз тиклешиучю,
Онгсузланы хакъын къымыб аз къауумла юлешиучю,
Мал болумгъа кёре халкъны нек бёлгенбиз  "башха", "тюбге",
Адамлыкъны нек сукъгъанбыз керилялмаз  къаты кепге?

Тик къалада джашагъагъаннга ёлюм  кириб илешмезми,
Аны кёксюл  тюрсюню бла, саны суууй  бетлешмезми,
Джаратханны  кёк - тёрюнде анга соруу сорулмазмы,
Гюнах, сууаб чекген базман аны ючюн къурулмазмы?

Дунияда хан, бий, алим джазыуундан къалалдымы,
Кёк Уллугъа улху бериб ёмюр джашар болалдымы,
Да нек болдукъ былай малкёз, азат къагъыт алгъанлача,
Джаратхандан "ёлмезлик деб" кесаматлы  болгъанлача?

Джаратылгъан - бары тенгди, тенглешейик, айырмайын,
Онгзузлагъа джакъ болайыкъ, Хакъгъа  джалкъа къайырмайын,
Байлыкъ - сезиб джан джылыуну башхалагъа бергенингди,
Ахыр кюнде сыйлы этер  дараджалы керегингди.

Къарангыдан къарангыгъа биз барабыз тизилгенлей,
"Ёмюр" деген ташлы джолда джан да, сан да эзилгенлей,
Къарангыдан бир кесекге баш къаратыб Кюн джарыкъгъа,
Анга "джашау" дейбиз, бара, тоюнмаучу  джер джырыкъгъа.