Фаьльгах ца тешаш ханна йи1игах лаьца

   Фарида дукха ха яр фаьльгах ца теша. Хьанзам-м из кхоллаг1ча классе яг1ар, из-м фаьльгах шоаллаг1ча классе яг1ача хана а тешацар.  «Наха шоашта дага а деха яздаь да уж»- аьннадар цо ший йийслаг1ча классе яг1ача йишийга, шийга фаьльгаш деша хьайна аьлач. Йишас ч1оаг1а дешар уж. Шийна книжкайц1аг1ара хьаэца эхь а хеташ Фаридайга дайтар цо.  «Хоза амасти ювца фаьльг балахь сона»- оалар цо Фарида книжкайц1а долча йодача хана.
     Фаридай-м лорий книжкаш деша безам бар. «Со лор хуг я,дика лор, наха дарб дерг да аз, беррига унахой тоаберг ба, ц1аккха а цамогаш хургбоацаш»-оалар цо ший наьнага.
     Бакъда лорий книжкаш з1амига алапашца яьздаь дар, б1аргасаьнашца мара 1одеша лургдацар. «Хьона хьалха да уж деша, йоаккха халча дешадда 1а»- аьлар цунга книжкаш хьателачо. Фаридайна из халахетанзар, цо кхета а дацар уж.
    «Фарида, ер ба хьона беза фаьльг- аьнна кхайкар цунга йиша- борг1ал къамарга фийг аьттаб, са ца а докхалуш, лор вез цунна». «Со борг1алий лор яц, аз наха дарб дергда- оал цо ц1аг1ара ни1 д1а а къовлаш. Циский ц1ог1а г1оз цунна, лохе 1охьажача ни1ара юкъедаха циский т1од го цунна. «Ва…1айха ни1 д1акъовлача хана лохе хьажа мегарг я хьона»-оал цхьане. Из йиши оаз яцар. Цу тайпара оаз Фаридайна хаза а яцар. Д1а-юха хьож Фарида. «Малув 1а лехар, со да хьона хьога лур»- хоз цунна лохера. Фарида 1о хьажача цунга лур циска дар. «Б1ара ца а хьежаш 1айха лозадаь са т1одага хьажа, де дезаш дола дарба а де цунна, лора хала г1ерташ ма лелий хьо»- аьлар цунга циско.
    Фарида 1алохаелча циска т1од бокъанца лозадаьдар на1ара юкъедаха.  Сиха циска марха а дела ц1аг1а чуйод Фарида. Цунна нанас йийца аптека ишкапачара боамби йодача а аьтта циска т1одата бул цо, таккха бинтаца  д1адехк т1од.
   Циско хьекхача т1аьда мотто сомайоакх Фарида.
   Д1а-юха хьажача саг вацар ц1аг1а, е циска а дацар. «Г1анахь ца гуш а дац хьама»- оал цо ше-шийца ела а елий. Т1аккха ара йоал. Хоза малх бар ара хьежаш.  Йокхаг1а йола йиш гаьнах йиса гударгат1а а хайна, ший когаш шийна к1ал а бехка фаьльгаш дешаш яг1ар. Гударга юххе даг1а циска дайра Фаридайна. Бинтаца дихка дар цунна  хьалхара т1од. Лозадаь т1ода мотт а хьакха Фаридайга хьажар из. Циска шийна б1арахьажача Фаридайна хийтар цо шийга б1аргто1абаьча санна. Хийтар е ишта дар из?