Дала имане дерзадолда вай

                Зулам леладаьчоа
                бекхам кхоачаргба.
                КъорIан, 4 : 123.

Дала аьттув ма боаккхалба гIалгIашта нохчашта юкъе бIеха цIур бехкача йовсарий! Цар багара арадала кечденна цIурхой дош Дала лакашка а оттадаь, йист хила йиш йоацаш, буссулба уж, бIеха юхькъолхой дош, деггаза уйла цар дагара дIаялалца! Царна кхоачаш де дага деха Iаьржа цIурхой гIулакх дагара, уйлацара дIакъасталца цхьаккха хIама хьаде, Дала аьттув ца боаккхаш, низ дIа ца кхоачаш буссулба уж!..

Дала имане берзаболба уж!.. Имане ца берзе Дала Ше нохчий гIалгIай мехкашкара гаьна боахалба уж!.. Иблиснаькъан шоаш беце совцар гIойле яр царна!.. Дехке балар декхар да царна Дала тIадиллар!.. Шоаш тийшаболх баь, зулам даь, халахетар тIаоттадаь къам шоашта къинтIера даккха деккхар да бусулба наьха. Дала тIадиллад бусулба сага параз - дехке валар. ДIакъовла йеза цар шой бIеха багенаш, гIалгIашта нохчашта юкъе цIур ца бехкаш!.. Мархий бетта цIенадаллар чIоагIа лоархIам беш да шоана Дала! Мархий бетта гIалгIай къам къинтIера даьккхе Дала хьалхашка маьл баккха шоашта, тIаккха Дала имане дерзадаргда шо!..

Везан Даьла, гIалгIай къаман гIо делахь, паргIатонга даккхалахь!..
Воакхан Даьла, гIалгIай къаман я вас каьдйелахь, цун баь тийшаболх хоарца а бий, цун бокъо метта оттайелахь!..
Дунен Доалахо, бехкечарна Хьай бехк баккхалахь!..
Везан Даьла, харцхой Хьай бекхамахь кхерабелахь!..
Воакхан Даьла, харцхой-цIурхой шоаш лелабу наькъа дехке бахалахь! 
Я Аллахь, цар дегашка йоала бIехал аратассалахь, цар синош кхестаду Иблис гаьннадаккхалахь!..

Ер сардам бац аз царна баьккхар. Са сино кхебаь, са дего къоабал баь, дегтIара боагIа сийрда ловца ба аз маьлхе баьккхар. Къиной никъ бита, маьле накъа тIа довла шоашта яхар ловца мара лархIа йиш яц. Ишта мара кхетаде дагIац са дош иман долаш, хьаькъал долаш, кхетам болаш, эзделца къаьста воацача бусулба саго. Цу санна уйла, из мо маIана тешал деш да аьнна лархIа йиш йолаш да Малсагнаькъан Ахьмадо яьздаь назам-дош:*

«Ля Иляха илля Ллах», сийдола вежари!
«Мухаммаду расулю-Ллах», сийдола йижари!

«Ля Иляха илля Ллах», из дош дегчура даьнна
Ха вайга ма йоагIийла, сийдола вежари!

«Ля Иляха илля Ллах», из дош дегчура даьнна
Ха вайга ма йоагIийла, сийдола йижари!

Дала диц ма лолда вай, сийдола вежари!
Дала диц ма лолда вай, сийдола йижари!

Из шийла Iаьржа лаьтта гIийла вайга кхайка,
Ший керахь вай дехаш, сийдола вежари!..

Из шийла Iаьржа лаьтта гIийла вайга кхайка,
Ший керахь вай дехаш, сийдола йижари!..

Даькъал наькъа тIа дейле, сийдола вежари,
Вай къинош цIенде вай, сийдола йижари!..

Цу Дала ца йеш йиса Iамал кхоачаш йе вай,
Вай Даьле дIадерзаш латт шоана, вежари...

Цу Дала ца йеш йиса Iамал кхоачаш йе вай,
Вай Даьле дIадерзаш латт шоана, вежари...

Дала диц ма лолда вай, сийдола вежари!
Дала диц ма лолда вай, сийдола йижари!

Из шийла Iаьржа лаьтта гIийла вайга кхайка,
Ший керахь вай дехаш, сийдола вежари!

Из шийла Iаьржа лаьтта гIийла вайга кхайка,
Ший керахь вай дехаш, сийдола йижари!

Дала имане дерзалда вай, сийдола вежари!
Дала имане дерзалда вай, сийдола йижари!

Цу Дала ца йеш йиса Iамал кхоачаш йе вай,
Вай Даьле дIадерзаш латт шоана, вежари...

Дала диц ма лолда вай, сийдола вежари!
Дала диц ма лолда вай, сийдола йижари!

Из шийла Iаьржа лаьтта гIийла вайга кхайка,
Ший керахь вай дехаш, сийдола вежари!

Из шийла Iаьржа лаьтта гIийла вайга кхайка,
Ший керахь вай дехаш, сийдола йижари!

Фаьргхой Хьамзат

Тушол бетта** 9-ча дийнахь 2022-ча шера
http://proza.ru/2022/04/09/937

ТIехьара дешаш

* Илли «Сийдола вежари, сийдола йижари!». Дешаш Малсагнаькъан Ахьмад да, мукъам бер малав шийна ховчо хьаала. Согар баркал дIаэца...
https://www.youtube.com/watch?v=OEtFHC3XV5Y
** Тушол бутт - апрель