Къачхы сагъыш

Къачхы кюнде джюрек шаушал болады,
Санынг дженгил арый, тоза талады,
Къыш да кенгден джуукълугъун билдире,
Анда - мында хыны джелле келтире,
Терезеге чапракъланы урады,
Чапракъ тёкген терегим да турады,
Тюгю тюшген джумарыкъча, сюйюмсюз...
Джокъду Джерде ёмюрлюк зат, ёлюмсюз.

Алай эсе - не магъана джашауда,
Кюнлей джортуу, излеу, алыу, ашауда,
Нек джан атдыкъ эришиуге, табыугъа,
Алгъа чыгъыу, уруу, джыгъыу, чабыугъа,
Нек унутдукъ адамлыкъны шартларын,
Нек басдырдыкъ сыйлыланы атларын,
Нек джашайбыз ариу сёзсюз, сезимсиз?..
Джокъду Джерде ёмюрлюк зат ёлюмсюз.

Бир кюн чыгъыб кетерибиз къайтмаздан,
Керек сёзню айтырынга айтмаздан,
Биргебизге аллыгъыбыз бир бусхул,
Сора некбиз дуния малгъа былай къул?
Алайды да, суукълукъну атайыкъ,
Адамлыкъны джолларына къайтайыкъ,
Джашамайыкъ тинсиз, динсиз, билимсиз...
Джокъду Джерде ёмюрлюк зат, ёлюмсюз.

Кёлюбюзню таза иннет джылытсын,
Акъылыбыз терс оюмну унутсун,
Хар адамгъа джан джылыуну берейик,
Хар адамны къуанганын кёрейик,
Алай бла да къуанч хауа джаяйыкъ,
Джайылгъандан биз да насыб алайыкъ,
Ёмюрюбюз тюгенмесин беримсиз...
Джокъду Джерде ёмюрлюк зат, ёлюмсюз.

1998.
Эльванкент. Турция.