1.Къарангы кече
Чыммакъ къар джауад,
Джел, боран эте
Джерни агъартад,
Сагъышла кери
Тарталла мени,
Акъ къар тюшюред
Эсиме сени.
Эжиую:
Къатымда болуб
Къолумдан тутсанг,
Алгъынча толу
Насыб джашатсанг,
Суукъ къыш кече
Кюн тиер эди,
Багъалы тенгим
Сен келсенг эди.
2.Алай джокъса сен,
Къар къаты джауад,
Къыйналгъан эсге
Сагъышла салад,
Озгъан заманны
Эсге тюшюре,
Мыдах къарайма
Буз терезеге.
Эжиую:
Сен кетген джолну
Боран сибире,
Къуу-шуу отоуну
Джелле кемире,
Мен санга джылай,
Санга тарала,
Акъ къаргъа къарай,
Къарча агъара.
3.Джаз келир джашнай,
Джайгъы кюн чыгъар,
Ёсюмню башлай
Табигъат чагъар,
Сен а келмезсе,
Кёзлеринг кюле,
Манга бермезсе
Чыкъ тюшген гюлле.
Эжиую:
Джюрегим такъыр,
Джан инджилгенлей,
Хар кюнюм – ахыр,
Къара кийгенлей,
Суукъ къыш кетмез,
Кюн тиймез энди,
Сени бла бирге
Джарыкъ ёлгенди.
КЕЧЕ
© Copyright: Софи Трам-Семен 2, 2022
Свидетельство о публикации №222062900825
Свидетельство о публикации №222062900825
Рецензии