Нарт джигитиме

Мени келтиргенингде,
Джарыкъ отоу юйюнгде,
Сюймекликден айтханенг манга,
Энди сени сюйгенинг,
Ички бла тенглеринг…
Ой, джигитим не болду санга?
Нарт джигитим, не болду санга?


Эртден сайын къарамынг,
Баш аурууну хапарын
Билдиреди таймайын манга,
Сёзлеримден къабына,
Кетиученсе абына…
Ой, джигитим, не болду санга?
Нарт джигитим, не болду санга?


Сабийлеринг шыкъыртсыз,
Ата кёлден ышыкъсыз,
Къарамайса бурлуб манга,
Танг алада кетиучю,
Ашхам–къара келиучю…
Ой, джигитим, не болду санга?
Нарт джигитим, не болду санга?


Сюймеклигинг кетдими?
Сокъураныу джетдими?
Бир айтсанг а, джашырмай, манга,
Болгъанмамы болумсуз?
Атлаймамы орунсуз?..
Ой, джигитим, не болду санга?
Нарт джигитим, не болду санга?


Нарт – юзюкню  туугъаны,
Шам – Къарачай уланы,
Джарашмазлай бу асыл къаннга,
Аманлагъа ушарча,
Ала кибик джашарча…
Ой, джигитим, не болду санга?
Нарт джигитим, не болду санга?


Къара чачынг агъарды,
Нюрлю бетинг саргъалды,
Тынгысызлай чыгъаса танга,
От къазанынг азыкъсыз,
Джарлы бийченг насыбсыз…
Ой джигитим, не болду санга?
Нарт джигитим, не болду санга?


Мени келтиргенингде,
Джарыкъ отоу юйюнгде
Сюйдюргененг кесинги манга.
Сюеме да – сюймезча,
Кёреме да – кёрмезча…
Ой джигитим, не болду санга?
Нарт джигитим, не болду санга?