Проса бабань катоц

Изображение: источник - интернет.
/Мокшанский язык/

Проса бабань сёрмав катоц тонгозе няренц сяканяти. Шава! Тоса кяжда тескафтозе мадяса и шарфтозе прянц лангс. Варжакстсь азоронц шири – тона станяк и ащи вельхтяманц ала коньф сельмот.

Шееронь кунцемс катось апак тонатфоль. Бабась, мзярда эрьгясоль, стадонга танцтиста порьфтезе. На-ка тувонь киськоня, на-ка мациень сюлоня, аньцек потяф лофцоня… Просань кядец наголь тевсоль. А тяни афи шерьхти, афоли, куломат срхкафни?

Кяжиясь сёрмафсь бабать лангс, яфодезе пулонц и комотсь вальмава. Илядень ушесь сетьмоль. Жувататне мадондсть, а велеряйхне сувсесть куду и пульхксть кудъёткова.

Вача пеке катось куцсь шуфтть пряс и венемсь таратть лангса бта байдек. Пеняцяй эсь потмованза талеканц квалма и азоронц эса сюци. Сонцьке бабась кулы и соньге, ямбарнять, тяфтане маштфтсы.

Смеказе катоть ковнясь менельста. Валгсь алу и озась каршек шуфтть пряс. Сёрмавть нльне сельгонзовок тусть. Тя аф ковня, а роди Просань пачаняц – покаряв, пиндолды, ваи.

– Месть тяса нюрьксят ськамот? – пеедезь кизефтезе ковнясь. – Афоли кудста панедезь али ёфси азорце аш?

– Кода стане аш?! – нльне комотсь катось, понацка стясь. – Ката лефкскакс нинге ташта эшиста таргамань и пялонза сявомань. Танцтиста симнемань-аннемань и пряняс вадерямань.

– А коса ина тяни азорце?

– Вастонц лангса, – яфодезе мадянц катось, – сиредсь Проса бабазе, аф тячи-ванды кулы. Шава сяканяти, мрдамазевок аф сай. Тязк и лядан.

Ковнясь лоткась пеедемда. Коняц срмавсь, курга пенянза нолдавсть алу.

– Тяфта бабаняти паронц пандсак? – пшкядсь сон катоти. – Кяльце кувака, а мялямце нюрьхкяня… – апряказе тумстонза и кеподсь менельти.

Арьсесь-тись катось и кодак нлнофты куду! Мадсь Просань мяштенц лангс, мрнай, корхни бабанц эса, пчкафты. Пачкодсь лямбоц сиреняти – панжезень сельмонзон и тошкась:

– Вакссонат, сёрмав катоняй? А мон ни арьсень, ворьгодеть, кадомайть… – Вадерязе копорьс тары коське кядьса и поладозе: – Максоза Шкабавазсь эрьгяня, стяян, пачат пицян – тоньге антте.

Катось шаштсь маланяти, путозе бабать тодунянц лангс прянц и мрназевсь, сяда ляпоняста, кода маштсь:

– Пачатневок аф эрявихть, Проса бабаняй. Аньцек стяк пильге лангс, матаняй.