/анамы дерслеринден/
Онгусузну кёзлери бла Аллах бизге къарайды,
Ауругъанны кереги бла Ол адамны сынайды.
Тилегенни бош къайтарма, маджалынгдан сайлаб бер,
Ауругъаннга кёб айтдырма, дженгил джетиб ишин кёр.
Хайыуанны уруб-тюйюб бауун, ашын кем этме,
Къарыуундан асламыны джюклеб аны инджитме.
Арбаздагъы парийни да хакъы барды адамда,
Аны къолгъа биз юретдик патчахбыз, деб, аламгъа.
Къартны сыйын кёрмегенлей тюртюб мыдах джашатма,
Ол ыразы болмагъанлай бир ишни да башлатма.
Адам хакъы, хауан хакъы барысы да сорулур,
Бир хакъ ючюн минг суабынг агъар суугъа къуюлур.
Эки мёлек имбашлада гюнах, сууаб джазыучу,
Алагъа уа не таша да туру болуб барыучу.
Унутмайыкъ, хар затыбыз билинибди Тёреге,
Ненча мысхал тартханыбыз ачылыбды кёреге.
Онгусузну къарамы бла Аллах бизге къарайды,
Хар кюнюнде этгени бла Ол адамны сынайды.
Аллах бизге къарайды
© Copyright: Софи Трам-Семен 2, 2022
Свидетельство о публикации №222071301237
Свидетельство о публикации №222071301237
Рецензии