/анамы дерслеринден/
Сёзню сюйген – ныгъышха,
Ат излеген – чарышха,
Сен сайлайса джолунгу,
Сен бересе къолунгу
Не - аман, не - игиге,
Акъыллыгъа, телиге.
Аман болса шогъайынг
Тутмаз болур тагъайынг,
Джашау - тикди, таярса,
Джан кючюнгю джоярса,
Ёмюр кетер бошуна,
Хата келе башынга.
Иги тутса къолунгдан,
Асхамазса онгунгдан,
Кёб ашхыгъа тюберсе,
Хайырлы иш этерсе,
Насыб болур юйюнгде,
Хузур турур кёлюнгде.
Чюйре адам – ачыулу,
Этген иши – чачыулу,
Ашхы адам – сабырды,
Аны джюрек алырды,
Ол санга сый келтирир,
Хош хауасын джетдирир.
Сёзню сюйген – ныгъышха,
Ат излеген – чарышха,
Къатын аллыкъ – кёрмючге,
Как ашарыкъ – чёмючге,
Къаугъа керек – бетлешге,
Джау къайтарлыкъ – сермешге.
Джашау джолла - санаусуз,
Бир къаууму - джараусуз,
Бир къаууму – ёрлетген,
Хорламынгы кёбейтген...
Сен кесингсе сайларыкъ,
Къадарынга байланныкъ.
2011
Адам кеси сайлайды
© Copyright: Софи Трам-Семен 2, 2022
Свидетельство о публикации №222071601135
Свидетельство о публикации №222071601135
Рецензии