Джарлы деулетим

Ай, Эресей, бир тюзелиб кеталмадынг,
Халкъларынгы кёз – къаш керир эталмадынг,
Абыннганлай, сюрюннгенлей алай турдукъ,
Джокълукъ сынай, умут эте джашау къурдукъ.

Коммунистле "коммунизм" дегенелле,
Джангы мурат, джангы талпыу бергенелле.
Демократла бек аламат сёлешдиле,
Мелхум джашау къурургъа, деб кенгешдиле.

Джыйырмадан артыкъ джылны сакълагъанбыз,
Ачыланы къатын къатха къатлагъанбыз,
Да Брежневни кюсер болуб тирелгенбиз,
Къуру джуртха къарар болуб сирелгенбиз.

Бусагъатда бир къауумду онглу болгъан,
Хыйла, питна, усталыкъ бла орун алгъан,
Къалгъан  халкъны джарсыулары эштилмейди,
Инджилгенни кёзю - къашы тешилмейди.

Ауругъаннга ачха болмай къаралмайды,
Джарлы адам  адамгъа да саналмайды,
Сабийлени хакъ тёлемей окъутмайла,
Омакъ сёзню айтыуну да къурутмайла.

Юйсюз - кюнсюз кёбле барды, ачыкъ къалгъан,
Бу палахны джаннгы властды халкъгъа салгъан,
Къуллукълагъа татахларын салгъандыла,
Алай бла да халкъны оннгун алгъандыла.

Бир къауумду Эресейден татыу алгъан,
Къралны ашаб, кесилерича закон салгъан,
Джуртубузгъа ие болгъан, джекледиле,
Ала халкъны  баш кёлтюрмез этедиле.

Хар керегинг кюнден - кюннге багъалана,
Джарлы халкъ да башчылыкъгъа тагъалана,
Ким биледи, неле болур, аллыбызда?..
Тюшюб къалдыкъ, джесир болуб, къаллыбызгъа.

Быллай джашау джашау тюлдю, инджилгенлей,
Къытлыкъ басыб халкъ мыдахды, баштёбенлей,
Башчылыкъ бла халкъ арасы араланды,
Насыб деген бизге джетмей джагъаланды.

Ай, Эресей, бир тюзелиб кеталмадынг,
Халкъларынгы кёз – къаш керир эталмадынг,
Мадарсызлай арсар болуб сирелгенбиз,
Тамам келиб джолсуз таргъа тирелгенбиз.

2016.