Сюйгенни кёлю тюйюмсюз

/анамы дерслеринден/

Сюйгенни кёлю - тюйюмсюз,
Сюймеген адам - сюйюмсюз,
Сезиую болгъан онглуду,
Сезимсиз - джарты джоллуду.

Ариулукъ - къарам терилтир,
Айбатлыкъ - кёзге илинир,
Акъыл десенг а - насыбды,
Акъылсыз адам джазыкъды.

Билим акъылны кереди,
Джашаугъа тамал береди,
Билген миллетге джарайды,
Халкъ анга сый бла къарайды.
 
Адеб джарашыу этеди,
Адебсиз кёзден кетеди,
Иш устасындан айтады,
Джигит хорлам бла къайтады.

Сёз чыкъгъан джерин танытыр,
Эсебсиз джашау арытыр,
Джакъгъа джакъ болуу - асыуду,
Джаугъа бой салыу джарсыуду.

Чомартха байлыкъ келеди,
Къоркъакъ минг кере ёледи,
Къызгъанч къолдагъын къысады,
Алай бла бетин атады.

Джуртунг бешикди, тебретген,
Къралынг уллунгду, юретген,
Халкъынг джанынгды, джашатхан,
Джюрек тёрюнг а - Джаратхан.

Быланы  билиу - билимди,
Билгисиз - абын-сюрюндю,
Алай барындан багъалы
Сезимди - джюрек тамалы.

Сезиую болгъан - сюеди,
Башхала ючюн кюеди,
Унутма, сюйген сюйюлюр,
Сюймеучю джандан тюйюлюр.

Сюйгенни кёлю - тюйюмсюз,
Сюймеген адам - сюйюмсюз,
Сезиую болгъан Адамды,
Сезиусюз - "адам" хайуанды.

1999.Стамбул.