Тилек

Келген джолум таш чачылгъан, тар аушлай,
Талпыу джерим солуу алыр, кюн турушлай,
Джан атама муратыма джетейим, деб,
Аякъ таяд тик къаядан кетейим, деб.

Джел урады кёз ачдырмай, онгсуз эте,
Ырхы келед тар аушха джол тюзете,
Таяма да билек болур джокъ адамым,
Илинмейин, тирилмейин джокъ мадарым.

Ёмюрюмю асламысы сюрдю, кетди,
Джара сала, джан ачыта муал этди,
Хончалагъа кюмюш кюрен тартылгъанды,
Кёзлериме кетмезлик ау атылгъанды.

Сюймегеним  сёз джетдире, тыйгъы къура,
Джан насыбым  хауле джеллей, онг - сол ура,
Джекге кетдим, тыш джерледе джерлеширге,
Насыб болмад туугъан джурт бла бирлеширге.

Улхучула, алдаучула, джалаучула,
Къабхын къабыб, джыртыб юзюб джашаучула,
Джуртда ёрге чыкъгъандыла, эзеу - эзеу,
Тюзлюк деген  джаныб тюшед, кёсеу - кёсеу.

Этим - дженгим тыш адамдан суукъ болуб,
Зарлыкъ, зулму, тюртюу, атыу азау туруб,
Джакъсыз къалыб къараландым, тамгъаландым,
Къарачайгъа кетмез халда мыдахландым.

Сюйген джаным сюймез болду,  кюе - кюе,
Назик джюрек берчден толду, тие - тие,
Сабий - балыкъ буюрмады джазыу манга,
Джан бас, Аллах, халал кёллю джангыз джаннга.

Баргъан джолум тикли джолду, ёрлет ёрге,
Тутхан ишим керти ишди, ётдюр тёрге,
Кюч бер манга, муратларым таркъайгъынчы,
Санларымы кёксюл ёлюм байлагъынчы.

1995дж.