Саьг1аз

Со з1амига йолча хана дар из. Цу хана-м со ишколе а ахацар. Ч1оаг1а хоза хетар сона саьг1аз. Бакъда, сона из 1увша  хацар, цергаш а етташ аза из 1очубуар.
Нанас «ма тела цунна саьг1аз…»- аьннадар са боакхаг1а болча вешийге е йишийге е.
Ца ховш цара саьг1аз 1обиллача чехка бага болар аз, таккха из согара хьабакха хала дар. Из аз сихха 1очбуар.
Дагадоаг1а сонна цхьан дийнахьа нанас шийца хьоашалла йигар со. «Хьа ханнара йи1иг я цара, цунца ловзаг я хьо…»- аьнна.
Цар я а яр са ханнара йи1иг. Ч1оаг1а боча йолча тара яр из. Кха бер а дари хьог1 цар, ц1аг1ам дацар . Хоза зизаш доахка коч а ювхаш, доаккха банташ а дохкаш моссех, ц1е бесса маьчеш а ювхаш, з1амига менгет1а яг1ар из тхо ц1аг1а чудаьлча.
Со цецякхара-м из дацар, цунна бага баьлла саьг1аз бар. Доаккха «шарикаш» а деш, мераж къайла а йоахаш, багара ара ухар из.
«Ай, 1очбуаргбеций цо из?...»- аьнна са нанас хьаьттача – «А… цунна хов из 1увша…- аьллар цун нанас.
Со цунна духьал з1амига г1анда а оттадаь 1охойир.
Дукха даьг1ар тхо йист а ца хулаш тхойла б1арахьежаш. Цо ловзабеча саьг1азага баге а йила хьежар со. Фо чу а дахийте йоаккха «шарик» йора цо, т1аккха из «т1ох» -аьлле эккхар, со кхоссалора кхера а еллий. Из хоз хиттий йи1иг елалора.
Ц1аьхха из елаелча цунна бага баьлла саьг1аз са йилача бага иккхар. Цергаш шойла в1ашаг1 а кхеташ сихха баге д1акъайлар аз.
«Мичаб са саьг1аз… мичаб са саьг1аз…» - яхаш елха йолаялар из.
Шой дувцаш хинна къаьмаьл соц а даь тходолча хьат1абаьхкар тха ноаной.
«Ай… фу хилар укхаза?»- йи1иг хьестар цунна нанас. «Саьг1аз багара 1обежаб са…»-йоахар йи1иго елха а елхаш. Саьг1аз лаха эттар ноаной. Массанахьа хьажар. Со яг1ачара меттахьа янайоцилга гуш дар. «Хьона байре из 1обожаш?»- аьнна хаьттар сога . Бордаш шойла в1ашкато1адаь, йист а ца хулаш корта лостабира аза, бага боалла саьг1аз гучабалар кхераш.
«Елха ма елха, аза кхы а мерзаг1а бар эцарг ба хьона»- аьнна хьаста а хьаста йи1иг соцайира цун нанас.
  «Ма сатийна я хьа йи1иг…- аьллар са наьнага цо тхо ц1адаха аьнна г1айтача - е даараг1а а кхийтанцар, е йист а хиланзар».
Багара 1о ца боакхаш, 1очу а ца буаш из саьг1аз 1ийшар аз ара баьд  яллалца, т1аккха беша д1акхассар.
 Цу дийнахь денза кха саьг1аз  а бианзар.