Бизге

Кюе кирди "тоннга", къакъмадыкъ,
От салынды "баугъа", чабмадыкъ,
"Джаныуар" тёрленди, атмадыкъ,
Кёкню "къаргъа" басды, чачмадыкъ.

Сора нек излейбиз чуакъ кёк?
Сантлыгъы дженгеннге не керек?
Тынгылауну басхан - кесибиз,
Дуния малгъа кетиб эсибиз.

Бюгюлюучю сыртха джюклеу бар,
Тёзген баштебенни теплеу бар,
Джау да ол болумну сезгенди,
Андан къара ишин этгенди.

Къоркъакълыкъ бийлеген джаныбыз,
Матухлукъ джайылгъан саныбыз,
Зулмугъа къызмагъан къаныбыз,
Оюмлау унутхан ангыбыз...

Бизничаны басар басарыкъ,
Мюлкюбюзню чачар чачарыкъ,
Терслик кесибиздед, джабмайыкъ,
Башхалагъа терслеу атмайыкъ.

Оноу тутханланы сынамай,
Этген, айтханларын ызламай,
Джауланы бошладыкъ, таймайын,
Алагъа халкъ джорукъ салмайын.

Кютю малча тургъан, кесилир,
Басханны тюртмеген, эзилир,
Халкълыгъын унутхан талкъ болур,
Аны къурутуу да хакъ болур.

Къул болургъа энди кёллендик,
Иблисни тили бла тиллендик,
Джекни тебси тюбюн ашадыкъ,
Халкълыкъ ангыбыздан бошадыкъ.

Кирсин кюе "тоннга", къакъмайыкъ,
Салынсын от "баугъа", чабмайыкъ,
Тёрленсин "джаныуар", атмайыкъ,
Бассын кёкню "къаргъа", чачмайыкъ.

2022