Юркгенме Эресейден

Къралым, дедим, кърал десенг а, джанмаз отлай,
Халкъ дедим да, халкъ десенг а, атар окълай,
Тенг, шох десенг, къолтукъ-къоюн, хурджун джокълай...
Ай, юркгенме Эресейден, къайтмаз кибик.

Къыйыр-бучхакъ алгъа чыгъыб, эзеу болуб,
Алим, билген, арсар халда, кенге туруб,
Тыш адамла оноу эте, кенгеш къуруб...
Ай, юркгенме Эресейден, къайтмаз кибик.

Сабий-балыкъ терс юрениб, терсге кетиб,
Тиширыула чекден чыгъар халгъа джетиб,
Эркишиле ачха ючюн итлик этиб...
Ай, юркгенме Эресейден, къайтмаз кибик.

Гуду, улху, зийна, питна бет тургъузуб,
Джалгъан шагъат, адам уруу адет болуб,
Эм сыйсызла орун алыб, алгъа туруб...
Ай, юркгенме Эресейден, къайтмаз кибик.

Онглусуна таш атыучу, сындырыучу,
Билгинине тюшер чалдыу салдырыучу,
Эм игисин сюд-джол бла джутдуруучу...
Ай, юркгенме Эресейден, къайтмаз кибик.

Дин башчыла - тюненеги аллахсызла,
Къуллукъчула тар тюшюннген болумсузла,
Халкъны кёбю - ачкёз, малкёз, тоюмсузла...
Ай, юркгенме Эресейден, къайтмаз кибик.

Ата джуртну эски халы тюгеннгенди,
Джангы тёлю танылмазлай тюрленнгенди,
Джек уммет да тёрге чыгъыб бийленнгенди...
Ай, юркгенме Эресейден, къайтмаз кибик.

Билгенлеге "билмез" тамгъа урулгъанды,
Ашхылагъа басыу-басхы къурулгъанды,
Джуртну чархы терс джанына бурулгъанды...
Ай, юркгенме Эресейден, къайтмаз кибик.

1999
Трабзон