Къаргъа басханды къаланы

Къаргъа сюрюу басхан бурунгулу къала
Турад къаудан тюзге кёлекгесин сала,
Къанатлы басхандан сур башлары тала,
Анга къарагъанны джан тынгысын ала.

Къуар умут этдим, таш атдым алагъа,
Хыны таууш этдим бетджан салгъанлагъа,
Алай тюбден ауаз ёрге ётелмеди,
Мийикдеги къауум таууш эштелмеди.

Джылдан-джылгъа юйрей, кёбейе, джайыла,
Хар кюн сайын былай кенгеше, джыйыла,
Джауар булут кибик къалынлашды сюрюу,
Миллетде да болмай аланы юркютюу.

Джангыз ауаз мийик джерлеге джетмейди,
Халкъ бирден тепмейин зулмучу кетмейди...
Бурунгулу къала турады сымпайыб,
Башындагъыла да чёгелле, гагайыб.

Къала иелери сабыргъа таш байлаб,
"Огъай" сёзден къокъуб, "Хо" дегенни сайлаб,
Сантча къарайдыла бу басынчакълаугъа,
Ангы джетмегенча хазнасын сакълаугъа.

Кюнаман келгенди, кетди джайны чагъы,
Джашау къаралгъанды, эсленмейди агъы,
Къаргъа сюрюу алды багъалы къаланы,
Энди ким къууалар алайдан аланы?!

Тауушлары-чарпыкъ, тюрсюнлери-къара,
Эркеги-тишича, тишиси-масхара...
Миллет кюнню кёрмез была къуулмайын,
Быланы кирлери джерден джуулмайын.