Джангыз кёзлю агъач киши

/анам айтыучу таурухладан/

Агъач Киши чегетлеге тёр салгъанлы,кёб кече-танг, танг да кече болгъанды,
Заман ырхы кибик, саркъа-агъа, ура-джыгъа, ала-элте тургъанды,
«Дуния онглусу менме» деген акъыл, деуню ичин, тышын алгъанды,
Джангыз кёзю да  джанар маталлы, онглулукъ къарам атханды.

Бир кюн тауну-тюзню аулай, джерлерине къарай джанындан тойгъанды,
Халы бузулуб, кюкюреб, чартлаб боз къаяланы джумдуругъу бла ойгъанды,
Тау джитилени, чымырталача, бир силдеми бла  къыргъанды,
Туу тереклени, алысын кибик, бармакълары бла джулкъгъанды.
Тебиую бла уа,  анга бойсуннган джаныуарлагъа къоркъуу салгъанды,
Къоркъгъандан бирер тешикге сугъулгъан  джаныуарлагъа джекиргенди,
Къолуна тюшгенни аузуна ата да, аманкъарын ауурланыб кекиргенди,
Да уруб алтыбармакъ аягъы бла джерни тебрендиргенди.
Джерни тутхан Ёгюзге да « башынгы тюз тут»,  деб, кюкюрегенди,
Алай эте, джерге, кёкге сыйынмаз кётен этгенди, сора
Тёгерекни къыра-джыра эрикгенинде, уллу Тейриге, кёкге темирчилегенди.

Башлагъанды, дейсе, Тейриге «Тейри», демей,
Тейриден келген тюз акъылны да башына иймей,
Хымил тартхан ол джангыз кёзюн бир тырнагъы бла къыра да джалай,
«Джангыз чегетге баш болуу манга азды», дегенди, къолларын джаныулай,
«Мендеги кюч бла Тейри манга-не истем», деб, базыкъ гюрюлдегенди,
Бойнун буруб, тогъуз кёкге ёт къусуб,кючюн билдиргенди.
"Тейримисе,  несе,  чыкъ аллыма, тартышайыкъ, атышайыкъ, силдешейик, джыгъышайыкъ, буушайыкъ!", дегенди,
Къатланыб, бюклениб,керилиб, чёмелиб, тюзелиб, ёрелеб  кючюн кёргюзтгенди.

Тейри анга джууаб бермей кёб сакълатханды,
Сора джерге, таугъа, суугъа  огъары джелни къакъдыргъанды,
Кёклеге да, къара-къара булут асыб, ачыутартар Элияны чакъдыргъанды,
Ускубрийге къуудуруб ургъу джангурну бошлаб, деуню тарбууннга тыйгъанды,
Суу Анасын къобарыб, джаныуарын, кесин да бир тар айрымканнга джыйгъанды.

Агъач Киши Элиягъа узала да, джеталмай онгсуз болгъанды,
Ол джангыз хымил кёзю  къагъай боран келтирген салам-чёбден толгъанды,
Элияны тутама,  дей да,  узала, юсюнде тюгюн  юйютгенди,
Огъары джелни тутуб тыяма,  деб, тюше-къоба сюрюкленнгенди,
Джангурну джутуб битдиреме,  деб, гаясын кёкге ачыб кёб сюелгенди,
Суу Анасы уа аны кёрюб, анга толкъун-толкъун, чачая-чачая кюлгеди,
«Тейрини сермешге чакъыргъан сенми эдинг?»,  дегенди,
Сора толкъунун къобарыб, ырхы къусуб Агъач Кишини юсюне бюркгенди.

Андан сора, онгусуз болуб, джангызкёз аждагъан  боюн бюкгенди.

Кече танг бола, кюн кече бола, заман кете-кете кетгенди,
Агъач Киши да, джалкъасын къашый, тюз оюм этер заманнга джетгенди,
Кётенли деуню  менме деген кёкреги уакъ-уакъ суугъанды,
Тейри бла атышыу, тартышыу, джыгъышыу тауукеллиги да тюбеллек къуругъанды,
Сора «менден кючлю кёре эм сен», деб, табыннгыч ёре салыб, Тейриге табыннганды.