Джюрегим такъыр...

Джыйырма биринчи ёмюр...
Джашау къара кюл - кёмюр,
Адамны сыйы - бир шай,
Даулет миллетин ашай.

Бойсуз бойлуну - джауу,
Ётюрюк тюзню - ауу,
Къуллукъчу болгъан - аман,
Аллайды бюгюн заман.

Къатынла - айгъыр, бетсиз,
Эркиши деген - ётсюз,
Къыз деген бары - "эркин",
Ачхагъа сата бетин.

Джаш адам - ишсиз, хакъсыз,
Къарт адам къралдан джакъсыз,
Халкъгъа берилген - бурху,
Джашау тамалы - улху.

Джаш тёлю - сыйдан узакъ,
Ачхагъа - джаны тузакъ,
Дуния мал ючюн джашай,
Ата сырыны ташлай.

Аман сёз болду  адет,
Кетди бет - намыс, адеб,
Сыйланнган болду  гуду,
Билгени, болгъан, уру.

Къайары бучхакъ - тёрде,
Маджалла - тарда, кёрде,
Башчылыкъ - халкъны джауу,
Джан джашатмайын даууу.

Кюнде халыбыз - былай:
Темир орнунда - къалай,
Аслан уяда - къабан,
Алим ишинде - шаман.

Бюгюн джуртума къарай,
Даулетни халын сынай,
Кюч табалмайма джарыр,
Андан - джюрегим такъыр!

Джыйырма биринчи ёмюр,
Джашау - къара кюл-кёмюр,
Миллет аджашхан халда,
Ким билир, не болур алда.