Рик1елай ракъурмир...

 (Прозадин шиир)

   За вучин, за гьик1ин? Секин жезвач зи т1ал рик1ин! Заз к1анзава вун патав жен гьамиша,аквар гьалда къакъатда вун, зи рик1 даим эзмишна,михьи муьгьуьббатдин гьиссер битмишна, эхирдай рик1ин гьиссер  бамишна,зун тек туна уьтмишна.Заз ван хьанач ви гафунин - пад жезва рик1,раханач вун гьич садра - пад жезва рик1, ваз яргъалай килигдай кьван пад жезва рик1.
    Рик1 ац1анва зи гьиссерив, сел хьиз къвезва Ст1ал вац1ун,мумкин тушни а гьиссерив ви рик1ни,зи азизди, ац1ун?! За ачухнач ваз садрани, к1анивиляй вун рекьизвайди зун.Бес акуначни ваз садрани зи вилерай, акурла вун ц1развайди зун?!
     Вун килигдай заз са вуч ят1ани гуьзлемишиз, зун лагьайт1а, гаф акъат тийиз, акъудайд хьиз гуьллеламишиз. Заз чизва, ваз хуш тирди зун, им, гьелбетда, к1анивал туш, я так1анвилин лишанни. На лугьузват1а, ваз к1ан я жед, амма шаклувили ваз
гузвач жеди ихтияр лугьудай: ингье зи рик1е авай, зун к1ани яр. Бес зи уьмуьр,хьайи, тахьай кутазва за ви к1вачерик, къуй руг хьурай кьисмет тахьай вун галачир са зи дуьнья.Эхь, са зи дуьнья, къуй куй ам захъ галаз зи к1анивилин ц1а, садазни манийвал тахьуй, садни гьич зун хьиз такуй,садазни мад зи муьгьуьббатдин ялав такуй...зи ашкъидин ц1ун мурцар... ваз такурбур низ герек я и уьмуьрда...
    Заз гьайиф я вун къакъатзавайвиляй, чидачир заз ик1 вилиз акуна,гъилиз текъведайди, гьавиляй мадни кич1е я, белки ваз гьич ерли, ви уьмуьр амай кьван гагьди чир жедач жеди заз вун к1анзавайди.Зун тамарзлу я йикъа садра кьванни вун акунихъ, ц1игел я зун ви вилерихъ цуькверихъ хьиз гатфарихъ, ви хъвердихъни ал п1узаррал къугъвазвай, зи рик1 вичел ч1угвазвай, заз наз гуз къугъвазвай...
    Зи дидар ваз чир тийиз эхна за пуд йисуз,са гафни ваз лагьанач, вучиз лагьайт1а вун зи вилик квай, заз гьар юкъуз вун аквазвай, гьа им зун патал виридалайни ч1ехи бахт тир. Амма гила вун ахкван хъийидач лагьай са хиялди зи рик1 гапурди хьиз ат1узва, ивидал звал гъизва.Гьавиляй за къе ваз зи рик1 ктаб хьиз ачухзава,белки мад ихьтин вахт заз кьисмет жедач жал, белки заз зи рик1е гьатнавай т1алди вав рахадай мажал вугудач жал.
    Ваз чир хухь, зи к1аниди, зун гьихьтинди ят1ани, ваз к1амай ва я делиди хьиз акурт1ани, заз вун зи уьмуьрдилай, и рагъ алай дуьньядилай, вири и дуьньядин мал-девлетдилай багьа я.Къенлай кьулухъ заз амукьдайди ви муьгьуьббат я, уьмуьр амай кьван гагьди зи хкакь тавур муьгьуьббатдин гьайиф ч1угун я.Заз чизва вуна заз гьихьтин суалар гудат1а, гьихьтин залан парар зав агуддат1а, амма зун гьазур я жаваб гуз, зи рик1 абурукай хабардар я.Зи гьалдикай гьик1 хабар гун,гьик1 лугьун?
 Анжах вунва зи рик1е кис хьанвай гьиссерал чан гъана, вуна зун ц1ийи кьилелай уьмуьрдин гелез хкана,  вуна зи вилер, гила муьгьуьббат ргазвай вилер ачухна, заз ц1ийи девран, ц1ийи уьмуьр, ц1ийи бахт багъишай вун акуна.Заз акуна вун циферикай  хкатай рагъ хьтин, заз гатфар гъайи сифте цуьк хьтин, зи бахтуникай мани лагьай, зи чубарук.
     Багъишламиша,белки вуна заз ваз ихьтин гафар лугьудай ихтияр гудач жеди, амма за вучин, зи рик1е авайди, мецел алайди гьа и гафар я.Заз вун анжах са зи чубарук хьана к1анзава, тек са заз мани лугьудай, тек са зал элкъведай, тек са захъ галаз лув гудай.
   Эгер вуна зун лайихсуз яз гьисабайт1а ви муьгьуьббатдиз, за вучин, завай ваз са гафни лугьуз жедач, завай гужуналди ви рик1е муьгьуьббат тваз жедач,амма зи рик1яй вун гьич садрани акъатдач, гьич садавайни вун зи рик1е эвез ийиз жедач.Перишан мани хьиз вун гьамиши зи рик1е амукьда.Им зи ихтияр я, садавайни къакъуд тежер ихтияр я.Им зи шадвални я, перишанвални, им гьа заз кьисмет хьайи бахт я.
    Вун къакъатун хьайит1а, за ваз вуч лугьун:къуй ваз ви халис муьгуьббат жагъурай, ви бахт ачух хьурай. Лув це азад билбилди хьиз, зун ви рекьелай ц1ай такьуна хкахьай ц1елхем хьиз уьмуьрлух  квахьда, я садрани зун вахъ галк1идай цаз жедач ви рекье. Эгер им чи сад лагьай ва эхиримжи рахун хьайит1а...сагърай , зи к1аниди!
     Анжах вуна садрани рик1елай ракъурмир: и дуьньяда, и чилин винел вун себеб яз рик1 ц1ай хкахьай къул хьиз хьанвай, мез яд ат1ай рехв хьизхьанвай , чан аламаз гьич са гьиссни чин тийизмай дели-дивана къекъвезвайди. Ада гьамиша гьа са мани яда, пашман, инсанрин рик1ер язухдив ац1урдай. И мани анжах муьгьуьббатди кармашай инсанриз я,абурун дерт-дуьгуьм мадни къизгъин, абурун рик1ерин ц1ай мадни ялавлуди хьун паталди.
     Рик1елай ракъурмир, зи азазди, рик1елай ракъурмир...
     Зун хьтин будалани и чилел алама...