Рагъдаса кагъат

Рагъдаса кагъат
Доб сог1аб рагъдаса рокъоб бач1араб,
Буго дица жакъа кагъат ц1алулеб.
Краков шагьаралда мугьру лъураб гьеб,
Лъабкъого соница нахъе ц1унараб.

Инсул вацас хъварал мухъалги ц1алун,
Дол ц1адулал сонал т1амула цере.
Цулъарав тушманас пасат гьарурал,
Росаби-шагьарал рихьула даим.

Рокъоре русинч1ел,ч1вараб бак1 лъач1ел,
Лъаббок1онаб кагъат жидее хъвач1ел,
Михъида х1ур ч1вач1ел муг1рул бах1арзахъ,
Бокьун буго дие к1алъай гьабизе.

К1удияб махщалил шаг1ир гуро дун,
Щвалде щвараб баян рагъул гьабизе.
Гьаб ц1алулеб кагътил бух1араб х1асрат,
Бич1ч1ун хъвалел руго рек1елал мухъал…

Мун рагъде араб къо лъала дадада,
Дуца къо лъик1 гьабун тараб росдада.
Рах1ат хун лъугьарай к1удабабада,
Бадиб маг1у ккурай инсул яцалда.

Я машин,я хьвани бук1инч1о дуе,
Араб  ах1улъ вахъун росулъа ине.
Сабурал,ругьунал галаби т1амун,
Т1ерхьана цевеса т1инав г1олилав.

Г1умрудал пикраби,рек1ел анищал,
Рук1ана г1емерал инсул вацасул.
Ват1ан ц1унизелъун нигатги гьабун,
Гьав рагъул часталде рогьалилъ щвана.

Рагъул рет1ел кьуна,рота бицана,
Цинги командирас лъай-хъвай гьабуна.
Карабин кодоб кьун к1алъай гьабуна,
"Гьалъ гъуре тушман"-ян т1аде жубана.

Гъаваридал хандакъахъ хиялалъ,макьилъ,
Кьерун ч1ун рихьула гьасул кьерилал.
Гьале кват1ич1ого рогьалил г1ужалъ,
Гьужум байбихьилин буюрухъ щвана.

Борхалъи-тушманас щула гьабураб,
Гьенир жанир кьерун немцазул куцал.
Киналго ишан ккун,карт1ахъги т1епун,
Т1ухьидул ц1ад базе бидухъ г1ащикълъун…

Йиго гьасда макьилъ эбел йихьулей,
Маг1ил бералги ц1ун гордухъ яхъун ч1ун.
Ч1умал руго кодор дурус рехулел,
Хирияв Бет1ергьан, ц1уне дир васан.

Воре дуца,дир вас, тушман вихьидал,
Вахчизе къасд лъоге, къадру холебин.
Къадараб ц1ар ч1вани ч1агого холев,
Халкъалъул берзукьа хекко вортулев…

Тохлъукье, квагьиялъ т1урк1ун ворч1арав,
Инсул вацас туманк1 кодоб босана.
Бихьараб макьуялъ таваккал т1амун,
Тушманасда данде гьужумалъ ана.

«Гьурра!»-ян ах1улеб кутакаб гьаракь,
Гьале рагъухъабаз цадахъ гьабулеб.
Доб немцал рахчараб борхалъудасан,
Буго гьазда т1аде гулил ц1ад балеб

Гурх1ел-рах1му гьеч1еб гьабзазул т1елалъ,
Гьале г1ужий росун ч1валел г1олилал.
Ч1ег1ераб ракьалъул кьер хисун буго,
Хварал жаназаби ц1ик1к1унел руго.

Бицун божуларев, бихьун божаги,
Бащдаб ротаялъе ками лъугьана.
Командир гъеж лъукъун нахъе вачана,
Чангоял тохтурас хвасар гьаруна.

Хвел щварал рук1ана рагъухъабазулъ,
Рухъана хабалал,рукъана гьенир.
Хут1аразе гьале буюрухъ щвана,
Рахча-хьван ч1айилан, ах1и базег1ан.

Бищун санаг1атаб бак1 балагьун ч1едал,
Дир инсул вацасе амру бач1ана.
Разведкаялъ ине сордо решт1индал,
Вач1ине кколилан кумекчи вачун.

Ккараб къо борхизе божилъи щведал,
Вищана кумекчи-казахав Жалсын.
Жидеда т1адкъараб т1убазелъун гьел,
Командный пункталде г1уждаго щвана.

Жанире риччана, кваназаруна,
Разведротаялъул политрук вач1ун,
Планщет къват1иб бахъун бихьизабуна,
Тушман вахчун ч1араб хъаладул сурат.

Михъида квер бахъун,гьездехун вусун,
Гьанже политрукас инструктаж лъуна.
Лъай нужеда гьанже,лебалал васал,
Баян щвезе кколеб координат буго.

Кинаб рахъ тушманас заг1ип тун бугеб,
Бугищ гьезий кумек т1аде бач1унеб,
Т1адч1ун лъазабизе х1аракат бахъе,
Нагагь бажарани, «асирги» викъе.

Бугищ кьезе суал,батанани кье,
Нужеда т1адкъараб т1убазе ккола.
Воре ц1одор рук1а,гьарула дица,
Гьанже къват1ир лъвине таваккал т1аме.

Командирас гьазул кверал росана,
Нух бит1ун русаян сабур к1алъана.
К1игоял ругелъул,щиб ккананиги,
Кумек цоцай гьабе,гьанже къват1ир лъва.

Жалсын цеве ана,хадув инсул вац,
Сардил бец1лъиялда х1урлъун т1аг1ана.
Ризаб рохьил нухал нахъа толаго,
Тириго,ц1одорго церехун ана.

Цоцай ишараби кверазги гьарун,
Гьал къокъунел руго т1адкъай т1убазе.
Къалмица кагътида г1аламатал лъун,
Къиматал баянал рищун толаго.

Борхатаб зодое борхьил агьлуялъ,
Ракетаби руго канлъуй риччалел.
Квал-квал гьабиялъе гьазул нухда ч1ун,
Хераб кеторузалъ гьарула гьаркьал.

Рогьен рехилалде щвезе кккола гьал,
Щобда нахъа бугеб нохъодул к1алт1е.
Дурнабаз хал гьабун,баянал ц1ехон,
Нахъисеб къоялде нахъ русинелъун.

Сог1ал сухъмахъ нухал минабаз ккурал,
Нагагь х1ет1е ч1ани,т1ут1ун рехулел.
Надида бараб г1ет1,сих1къот1и сверухъ,
Сун-бакун кенч1олел ракетазул мухъ.

Рохьил талаги тун,лъарахъе щведал,
Лъалхъеян Жалсынил ишара бич1ч1ун,
Инсул вац вахчана гъот1ода нахъа,
Немцазул хъаравул вихьана гьезда.

Гьесул хьвада-ч1вади лъазе гьабуна,
Гьев хисун вач1унеб замана лъана.
Нахъ русун унелъул,санаг1ат ккани,
Асирги викъила къуват бак1арун.

К1иявго ц1иркъ г1адин рахчун харана,
Нохъода жанире цадахъ лъугьана.
Жалсыница карта къват1иб бахъана,
Тушман щулалъараб борхалъи лъазе.

Щивго кант1улареб нохъода рахчун,
Хал кколеб буго гьаз дурнабаздасан.
Доре-нахъе унеб немцазул къадар,
Дурусго рик1к1унеб буго гьаз цадахъ.

Цо гурон нух гьеч1еб борхьазул рук1ел,
Буго щула гьабун киса-кибего.
Бакът1ерхьул рахъалда борхалъи буго,
Хъала бахъиялъе кумек гьабулеб.

Координатал ц1ехон дир инсул вацас,
Командир вохулеб баян босана.
Бичанте  гьенисан г1арадаги бан,
Немцазул г1умрудал жужах1 лъугьине.

Лъик1алан заманалъ халкквей т1обит1ун,
Карта г1аламатаз ц1езе гьабуна.
Гьанже нахъ русине заман щванилан,
Жалсын гьудуласда гьимун к1алъана.

К1удияб нух буго нахъа тезе гьез,
Гьанже «асир» викъи буго рек1еда.
Бец1аб сордо буго гьезий кумекчи,
Командир ч1ух1изе х1адурлъи лъуна.

Х1ат1ил сас лъалареб рилъада рач1ун,
Реч1ч1ана к1иявго тушманасда т1ад.
К1алдиб жо къазабун,къуватаб лага,
Бухьа-къот1ун лъуна бер къапилалде.

Немцазул караул т1аде щвелалде,
Т1аг1ана берзукьа лебалал васал.
Асирги хадув ц1ан,ругьунаб нух ккун,
Рагъулаб  часталде щвана рогьалилъ.

Рек1еда ратидал ракетал риччан,
Рохь бац1ад гьабизе гьабигун цадахъ,
Гьанже фашистаца рота бит1ана,
Ракь хъвалхьун т1аг1арав валагьизелъун.

Ватич1о викъарав,щвеч1о гьев кодов…
Командный пункталда ц1ех-рех гьабулев
Гьак1к1ан к1алгун вуго,ккараб лъач1ого,
Ч1алог1ан ворхатав, «асир» гьавурав.

Гьес кьурал баяназ бигьалъи щвана,
Щулалъи бахъизе х1адурлъи лъезе.
Разведкаялъ араз бач1араб карта,
Камилаб батана командирасда.

Киназдаго цере ц1аралги ах1ун,
Инсул вацгин,Жалсын к1одо гьаруна.
Гьезий шапакъатал кьезе кколилан,
Комбатгин,замполит цадахъ к1алъана.

Нахъисеб къоялда «асир» вачине,
Аскаралъул бет1ер живго вач1ана.
Жалсынгин,инсул вац аск1оре ах1ун,
Рец-бакъ гьабун тана,баркала кьуна.

Буго гьанже цебе гьужумалъул къо
Къиматал баянал балъго дандги ран,
Блиндажалда ругел рагъухъабазда,
Рагьун лъазабуна метерисеб план.

Лъик1аб къуват буго бак1арун данде,
Доб кьурулъ т1епараб хъала бахъизе.
Балъго тушманасде цадахъ кьвагьизе,
Нусго х1ара буго х1адурун гьале.

Х1инкъи-къай лъаларел разведчиказул,
Къуватал баяназ божилъи лъуна.
Къаси саг1ат к1иго т1убараб мехалъ,
Т1аде к1анц1иялъе буюрухъ щвана.

Щивасул рек1еда к1удияб гъира,
Бергьенлъи босизе гьабураб нигат.
Нагагь хвел щванани-щивасул калам,
Нахъе хут1араца рукъе жалилан.

Рокъой кагътал рит1е,рит1ухълъи бице,
Бихьинчилъун хванин хабар ккезабе.
Ват1аналъ т1ад къараб къадруго т1убан,
Къаникье анилан телеграмм кьабе.

Кьог1лъигин,ресукълъи къойил х1ехьарал,
Х1алихьатав тушман малаца мерхье.
Таваккал къуватал,къадру ц1ик1к1арал,
Къасе бихьизабе зарулаб кутак!

Командный пункталда данделъараца,
Кинабго масъала мух1кан гьабуна.
Микьабилеб рота минометалгун,
Бакът1ерхул рахъалде Жалсынгун ана.

Жиндаго ругьунаб нух т1аса бищун,
Гьес рота бачана балъгояб щобде.
Щибасда абуна ц1одорго ч1аян,
Дица квер хьваг1идал цадахъ кьвагьеян.

Кьурда нахъа рахчун сапёрал руго,
Нухал рац1ад гьарун гьужумалъ ине.
Гьале саг1ат к1иго т1убараб мехалъ,
Т1огьилаб ракета зодобе ана.

Нусабго г1арада цадахъ к1алъана,
Цинги миномётаз мадар гьабуна.
«МИГаца», «ЯКаца» цоцада хадуб,
Борхалъуде т1аде бомбаби рана.

Рек1едаса араб немцазул аскар,
Блиндажги рехун тун лъутизе рана,
Лъабго саг1ат инч1о гьужум байбихьун,
Борхалъи нилъераз эркен гьабуна.

Гьенир къурбанлъарал г1емер рук1ана,
Г1ажизлъун лъугьарал таманал ккана.
Лъик1аланго фрицал кверде росана,
Камилал сурсатал гьенир ратана.

Гьабураб х1адурлъи дурусаб ккана,
Доб борхьил борхалъи бихизабуна.
Ват1ан ц1унизелъун ц1адулъе арал,
Ц1арал ц1унун нижер рак1азулъ руго…

Дун пикрабалъ вуго дова рик1к1ада,
Дирго инсул вацгун,Жалсын ц1ехолев.
Щибдай гьезий ккана,киндай гьел руго,
Гьел суалал руго каранда ригъун…

Комбатгун,замполит полк данде к1ут1ун,
Ккараб камиялъул х1исаб гьабулел.
Сиях1ал ц1алулев старшина Кличко,
Кумекалъе аск1ов -к1иго г1урусав.

Кват1ич1ого гьезда т1аде рач1ана,
Казахав Жалсынги,дир инсул вацги.
Свакан тату хварал,регизе бокьун,
Риц1ил гъвет1 бугелъуй кьижизе ана.

Рах1атаб макьида кижун ккана гьел…
Жалсынил цабзазул къирщи раг1ула,
Рек1ел ццин чучараб къаг1ида гьеч1о,
Дир инсул вацасги зарал рукъула.

Рагъул гьаракь жакъа раг1улеб гьеч1о,
Гьуинаб макьида кьижун ккаразда.
Рик1к1ада хут1арал г1ага-божарал,
Ратила рек1елъ къан гьал к1ияздаго…

Зодор роржанхъулел т1адагьал х1анч1и,
Рагъул сас къот1идал макънал т1амулел.
Т1анхал щуршузарун щурула гьури,
Щибаб гъот1ол раг1дукь кьижун солдатал…

Дидаго х1ал к1вараб къаг1идаялда,
Къокъаб баян кьуна кьог1аб доб рагъул.
Борхьазул къавмалъе къвак1араб жаваб,
Къадру бугел васаз кьураб куц рехсон.

Дов инсул вацасул кагъатги ц1алун,
Ц1адулал соназул пикру гьабула.
Гьезул къвак1иялъул,къадру-асалъул,
Къаси-къад ч1еч1ого х1исаб гьабула.

«Ват1анияб т1алаб т1обит1улаго,
Т1ерхьарал ц1вабзазул ц1ар к1очонарин».
Нилъер г1акълу т1ок1ав Г1алих1ажица
Т 1амураб кицидул камиллъудал гуч.

Т1ок1аб бихьугеги нилъер васазда,
Вах1щияб доб рагъул рокьукъаб сурат.
Рагъуй кор боркьулеб квешаб т1елалда,
Балагь тун бат1ияб лъагеги щибго.

                2005 сон