Тюрленди заман,
Хар кюню-басхы,
Баш болду аман,
Тюртюлдю ашхы.
Джашау аджашды
Терс джолгъа кириб,
Адамлыкъ шашды
Итликни кёрюб.
Джалгъан кертини
Тамырын къазды,
Бетсиз тёрленди,
Намыслы азды.
Къазауат джаныб
Къанла тёгюлдю,
Зулмудан къаныб
Боюн бюгюлдю.
Болгъанбыз сантча,
Къаршчы туралмай,
Эркинлик антча,
Кёлге орналмай.
Джумгъанбыз кёзню,
Барны кёралмай,
Басдырдыкъ ёзню,
Бёгеклик болмай.
Джалгъан кёрмючге
Сейирсиннгенек...
Къарангы кючге
Сежде этгенек...
Ай, медет, дейбиз,
Алай, не келсин?!
Тюз джол излейбиз,
Алай, ким билсин?!
Эркин Дунияда
Тарлыкъдан талдыкъ,
Джекге къул бола
Джеклешиб къалдыкъ.
Ай, медет!..
© Copyright: Софи Трам-Семен 2, 2022
Свидетельство о публикации №222121701164
Свидетельство о публикации №222121701164
Рецензии