Спецыфiка лётнай рамантыкi
Сцеша на суседнім ложку падняла вочы ад тоўстых нітак, з якіх майстравала ляльку для дачушкі гаспадароў хаты, дзе яны кватаравалі. Лялька ўжо мела імправізаваную спадніцу і рукі, раскінутыя крыжам, а Сцеша даплятала ёй касу.
– Табе для чаго наогул? – асцярожненька спытала яна.
– Ды проста! Што за дурная завядзёнка – усюды прыплятаць рамантыку? Я супраць! Калі хлопец чужы, то гэта не спатканне, а... тыпу знаёмства. І рамантыка ні пры чым. Калі ж вы... ну, разам... то і тут не да месца. Легкадумна!
Сцеша сентыментальна лыпнула вейкамі.
– А я люблю рамантыку, – прамуркала яна.
– Усё з табой ясна, фінціфлюшка! – Ліда змерыла крытычным позіркам спярша яе, потым ляльку. – Галоўнае, не развучыся авіяпушкі чысціць, пакуль коскі пляцеш!
– Ай, ну чаго ты зноў? Глядзіш, і табе плесці пачну. Вунь, адрасціла!
Сцеша мела рацыю: за апошнія месяцы Лідзіны кудзеры дасягнулі плячэй і сталі вымагаць «дзяўчачага» догляду – які яна цярпець не магла. Але стрыгчы не стрыгла. Толькі завязвала на час вылетаў шпагатам, каб не лезлі ў твар з-пад шлемафона.
– Мо табе слова не падабаецца? – працягвала Сцеша. – Дык выдумай сваё, і канцы... Як лічыш: маляваць твар ці не?
Ліда прыкра шморгнула носам і кінула грэбень на ложак.
– Цьфу, сваё! А ў галовах т о е застанецца. Якое можна чапляць да ўсяго... Ды без розніцы, твая лялька – ты і вырашай.
Сцеша замацавала касу чырвонай ніткай і любоўна завязала канцы банцікам.
– Не, не буду маляваць! У мяне рукі не з таго месца, – паведаміла яна. І хітравата прымружыла вочы. – Дарэчы, пра ру-укі! Ведаю я, з чаго ты! Хто ў нас сёння дзяжурыў у самалёце, а? І хто-о-о да яе прыйшоў пасядзець на крыле?..
Лідзін твар акамянеў, шчокі пайшлі плямамі.
– Нічога ты не бачыла! – выпаліла яна і шпурнулася падушкай.
Сцеша, пырснуўшы, залягла – снарад пляснуўся ў сцяну, і з яго палезла салома.
– Анягож, не бачыла! Ды і што рабіць на ўзлётцы таварышу намесніку кампалка? У яго і на КП спраў заваліся...
– Ах ты ж паскудніца! Прышыю, натуральна! – ускіпела Ліда, сціснуўшы кулакі.
Аднак здзейсніць пагрозу не паспела. Вызірнула міма Сцешы ў акенца – і спуджана скацілася з ложка, як па трывозе.
– Ч-чорт!
Яна ўскочыла ў боты, ледзь вылучыўшы колькі секунд, каб накруціць анучы, а пасля паспешліва занырнула ў гімнасцёрку, блытаючыся ў рукавах.
– Пайду... прагуляюся! – мармытнула цьмяна і страсянула чорнай вычасанай грывай. – А будзеш трапацца – во!
Яна грозна замахнулася рамянём, перш чым зацягнуць яго на стане, і куляй вылецела прэч, ляпнуўшы дзвярыма.
– Будзем-будзем яе заплятаць. Проста яна пакуль не ведае! – запэўніла ляльку Сцеша. І, вельмі задаволеная, пасадзіла яе на Лідзіну падушку.
07.01.2023
#райтчэлендж
Свидетельство о публикации №223010901522