АхIерадарая дигай

Дунъяла адамти гьар бархIи гIяхIдешличи хьулбикIули ва бирхули хIербирули саби. Челябкьлализиб бируси гIяхIдешличи хьулбикIнили бургар Сагаси Дусла байрамра халкьлис бахъ дигахъусили бетаахъурси. Сагаси дус бехIбирхьухIели гIямрули бяркъурти, гьести дусмачибти адамтира бархли, биштIати дурхIниван сихIрула гIяхIдешличи бирхутили ва хьулбикIутили бетарули бирар.
Дурхъаси бусурман динна вакилтала ургаб, - ил нушала байрам ахIен, - бикIутира къаршибиркули бирар. Дила пикрили, илди хатIабиркули саби. СенахIенну нуша хIердируси манзилла тарих хIясибли сагаси дус лябкьули саби, сунела къайгънира, разидешунира сабира.

Христиантала динна тарих бузахъули хIербирули саби халаси улкализиб, Россиялизиб лебилра халкь. Сай акIубхIейчибад тарих бехIбихьибси Исус Христос биалли Дурхъаси Кьуръайзив марварибси ГIиса Идбаг сай (гI.с.). Лебилра идбагуни, ЧевяхIси Аллагьли халкьличи бархьибти дурхъати Вакилти (Расулти) саби. ГIисара (гI.с.) бегIлара дурхъати идбагуназивадси сай. Илала хIурматбирули, улкализиб бузахъуси тарихла Сагаси Дусла байрам бусурман дин бузахъутас дураберкIесра асубирули бургар или пикририкIулра.
Сагаси дусличил бархбасахъи, гIурра ца уркIиличиб лебси пикри бурес хьулрухъунра.

Дунъяличиб машгьурбиубти адамтала, улкнас гьуни чебиахъутала, гIялимтала, писательтала гIямруличила бурути документальный кинобачи хIерикIули гIяхIцад акьуси замана буркIули рирус. Илдала ва нуни балути адамталара кьисматуни пикридирухIели, дунъяличир бегIлара дурхъати адамтала, тухумтала, жагьилтала ургарти дигира бизи-ванадешра сари или гьанбиркули саби.

Чула дурхIнас гIяхIдеш бирулра или пикрибикIути халатани, чула хIялалти хIялани аргъес хIебиубти жагьилтани, халкьла ургаб лебти дигиличира дигайличира кьяскабирути вайбаркьунани, цархIилла талихI тIутIубарили, чус талихI сархес дигутани, дунъяла адамтала ургар дигайра уржибдешра калахъес далтули ахIен.

ГIур кьанниван, гIямру деркIили гIергъи, иргъули сари илдани гIямрулизир дарибти хатIаби. ИлхIели талихIра гIямрула жагадешра чардарес вирули ахIен.
Адам кавшалли, такьсирла вегIлис кьяркьси танбихI бирули саби. Адамтала ургарти дигайра дигира кадуршути мезлукьуни нягIнара танбихIра агарли кавлули саби.
Амма лерил секIал чевяхIси Аллагьли чедиули сари. ЦархIилла талихIлис, дигайлис, бузерилис диргалаухъунси адамли талихIра, дигайра, хайриличилси бузерира даргес вирули ахIен.

ХIушала талихIра, дигайра, пагьмура вавалидяхъяхъес багьандан, цархIилтала дигайра, дигира, пагьмура ахIерадарая сагаси дуслизир ва лерилра гIямрулизир.
Лябкьуси сагаси дуслизир лебтанилра, талихIли дицIибти бурхIни деркIабая.