Мурталра нушачилси Фазу

Мурталра нушачилси Фазу
Февральла 28-личиб поэзияла театрла заллизиб Дагъиста халкьла поэт Фазу ХIямзатовна ГIялиева акIубхIейчирад 90 дус дикнилис хасбарибси вечер бетерхур.


Гьаланачибал бурес чебиркур, поэзияла байрам чебаэс гIядатла тяхIярли хIядурбарилри, амма илаб лямцIбикIулри рухIла давла ва пагьмула ахъси даража.
Вечер ибхьули гъайухъунси Дагъиста писательтала Союзла председатель МяхIяммад ГIяхIмадовли уркIи-уркIиларад дурибти дугьбани, Фазу ГIялиева пагьмучерсили, уркIи гьаргсили, гIядатла ахIенсили чераахъиб.

 
Марлира, Фазу ХIямзатовна гIядатла хьунул адам ва поэт ахIенри. Сунела алавси дунъя жагабиахъес, халаси пагьмура бедили, акIахъубси рурги ил Аллагьли.
Нуни Фазу ГIялиевала лерилрара-сера прозала произведениеби делчIунти сари, амма поэзия гIяхIли балули руили ахIенра. Илар зайдухъунти назмуртазибси Фазула уркIила гьаргдешли, ну хIяйранрарира.


Муса МяхIяммадовли сунела гIямрула рархкьяс делкIунти дугьби, ва Фазу ГIялиевани сунела уркIили чеввикIиси гьалмагълис багъишладарибти назмурти гIур чинаралра диэс хIедирар или гьанбикиб. Илди дурхъати умути хIяланани акIахъубти пикруми сари, багьалис асес, кирилис сасес, умцIули даргес хIейрути, ЧевяхIси Аллагьли илдас дедибти марти дигайличила. Илдигъунти пикрумани, хIяланани сецад давлачердирули гьарил адамла рухI.


Илкьяйда биахъес гьариллис дигахъули бургар, амма илдала назмуртазиртигъунти дигай гьариллис кьадардирули хIедургар. Кьадардиаллира, илданиван уркIи гьаргли, бахъ жагали, чула хIяланачила бурес бахъли бирули хIебургар.
Ахъси гьавлира, гьаргси уркIилира, халаси пагьмулира акIахъубти назмуртани, шихъла бацли дугиван, цалабикибтала уркIби шаладариб.

 
Фазу ГIялиевани, нешличила делкIунти дугьбачил далай бучIухIели, биса дарцдикили, далай белчIес хIейрули калунра, - викIулри Россияла Федерацияла урибси гIяртист ТIагьир Курачев. Илини далай бучIухIели, кIарахъала мез хIедалули риасра, нура нешла рухIличи гъамриахъубра. Фазу ГIялиевала дугьбачил гIурра гIяхIцад далуйти делч1ун цархIилти кIарахъала гIяртистунанира. Илди лебилра халаси пагьму лебти далайчиби сабри. Илдала далуйтани дунъя жагабирулри, уркIила гьав ахъбирулри, Фазу ХIямзатовнала каргьурти дугьби гьатIира жагаси лямцIличил халкьличи диахъулри.


Фазуни, сунела творчестволичил, гьаннара бахъал адамтала уркIбачи гIяхIла шайчиб асарбирули сари. Илини МяхIяммад ГIяхIмадовлизи сага-сагали назмурти лукIахъуливан, далайчиби далайра бикIахъули сари, назмурти дучIути биалли, дунъя дигахъути ва гIяхIти бетарахъули сари, сунела гIелаб батурси пагьмула хазнали, дунья жагабирахъули сари.

 
Дагъиста халкьла илгъуна поэт лерниличи уркIила шалати пикрумачил кьяскариубра.


Муса МяхIяммадовла «Ну художник виасри» бикIуси назмулизир Фазу суратрарес дунъяличир лерти рангани ва художникла пагьму хIебаили, жагати дугьбачил, дахъал ранганачил чераахъилри илини Фазу ХIямзатовна.

 
МяхIяммад ГIяхIмадовла, Фазу гьанриркахъули белкIунси, сагаси назму, кIарахъала  мезличил белч1ун. Нуни гъай хIергъули риасра, жагали зайбикIулри.
Ишаб бурес рирус, дила уркIилизи жагьхIейчирад арацIибси, нурегIси Фазу лерниличилара. Илала прозала жузи, хаслира «КIел кьурч», мурталра дила някълизиб бирусири. Сели биалра рачарархахъибхIели, гIяхIси хIяйчи ракIес багьандан, ил нуни някълизи кайсусири. РиштIахIелила гIямруличила, нешличила, хала нешличила, унра хьунул адамличила, дургъбас гIергъити дусмачила, муруйчилти сунела гIямруличила делкIунти хабуртазир гIямру сари лертиван чедаахъибти сари. Хабурти марти диъниличи ну рирхусири, наб къаршидикибти къияндешуни чекасес илдани гьамадбирахъусири.


Вечер лебтасалра жагадешличил гьунибаънили бетаур. Цалабикибтала уркIби рази-шаладариб.