ОЮМ

"Къарда" сокъмакъ салдым, барайым, деб, ёрге,
Мурат тартды, таймай, элтирлей кенг джерге,
Джан-джанымы суукъ "къар хунала" басыб,
Джыгъыла да тура, джаным, саным ачыб.

Кюнайыкъгъа чыкъдым, солуум таралыб,
Мурат тургъан джерге къарамым аралыб,
Оюмуму тинтдим, эсебими чертиб,
Ишни тутайым, деб, кесиме кёл этиб.

Алай хал тирелди заманнга хорлатыб,
Чёрчек аякъланы хылеуча атлатыб,
Талпыуум бар эди, джылым арсар этди,
Мурат да сакъламай кесин керилетди.

Тёнгек кючлю заман акъыл къаталмайын,
Акъыл бишген заман санынг туталмайын,
Былай нек этдинг?-деб, Джаратханнга сордум,
Алай джуаб табмай тура-тура турдум.

Энди эниу барды кюнайыкъ мийикден,
Энди сагъыш барды аман, игиликден,
Къыйын джол джюрюдюм, кёб ачыгъа тёздюм -
Насыб кюн келирден умутуму юздюм.

Ёмюр - джол тутууду, кюнле - тиреулелле,
Умутла, сезиуле - кёллендириулелле,
Мурат толур деген - джалгъан ышаныуду,
Джашау деген тёре - джокъгъа алданыуду.